Santágoda 11 jasar chılılik ánshi Maksımo Leon Chılıdiń dástúrli ulttyq bıi ári mýzykalyq janry sanalatyn kýekany Qazaqstanǵa arnap oryndady. Kazajistán, pueblo valiente («Qazaqstan — aıbyndy halyq») atty kompozısıa Dımash Qudaıbergenniń Chılıdegi alǵashqy konserti qarsańynda shyrqaldy, dep habarlaıdy infohub.kz saıty.
Óner kórsetý el úkimetiniń rezıdensıasy ornalasqan La-Moneda saraıynyń aldynda ótti. Jobany Maksımo Leon men «Chılı — Qazaqstan» dostyq qoǵamynyń qos dırektory Karmen Sandoval daıyndaǵan.
Kompozısıa Chılıdiń ulttyq merekeleri Fiestas Patrias aıasynda usynyldy. Sonymen qatar avtorlar ony Qazaqstanǵa jáne Dımashtyń aldaǵy konsertine arnady.
Kýeka Chılı mádenıetinde erekshe oryn alady. Ony jup bolyp mýzyka men ánmen bıleıdi, al bıdiń ózi eldiń basty sımvoldarynyń biri sanalady. Karmen Sandovaldyń aıtýynsha, jańa kompozısıa tolyǵymen basqa elge arnalǵan tuńǵysh kýeka boldy.
«Kýekany bıleıdi, ony jaqsy kóredi jáne qurmetteıdi. Ol bizdiń tarıhymyzdy, poezıamyzdy, dástúrimizdi jáne halqymyzdyń tózimdiligin jetkizedi. Bizdiń kýeka — búkil Qazaqstan halqyna degen qushaǵymyz», — dedi ol.
Kompozısıanyń mátinin Karmen Sandoval jazdy, mýzykasyn Mýndaka Antınao ápkeli-sińlileri jasady. Jobaǵa Latin Cover Chile men Coliseo Kids te qatysty, al jazýmen RA Estudio stýdıasy aınalysty.
Dımash Qudaıbergen Chılıde 24 qarashada alǵash ret óner kórsetedi. DIMENSIONS týry aıasyndaǵy konsert Santágodaǵy Movistar Arena sahnasynda ótedi.
Buǵan deıin «Kýrsıv» Dımashtyń jankúıerleriniń álem boıynsha ártis týryna qalaı daıyndalyp jatqany týraly jazǵan.
Dımashtyń aldyńǵy álemdik konserttik týry Stranger úsh jylǵa sozyldy: 2022 jyly Almatyda bastalyp, 2026 jyldyń qarsańynda Rıgada aıaqtaldy.