Дофамин мен норадреналин деңгейінің жоғарылауы миға мағынасы айқын емес грамматикалық құрылымдарды тезірек ажыратуға мүмкіндік береді. Бұл тұжырымға Неймегендегі Макс Планк қоғамының Психолингвистика институтының зерттеушілері келді, деп хабарлайды infohub.kz сайты.
Адамдар шатасқан сөйлемдерді қалай қайта түсінетінін анықтау үшін ғалымдар 30 сау еріктінің қатысуымен эксперимент жүргізді. Қатысушыларға соңындағы бір сөз айтылғанның мағынасын толық өзгертетін екіұшты сөйлемдерді оқу ұсынылды.
Сынақ барысында еріктілер екі сессиядан өтті: біріншісі — плацебо қабылдағаннан кейін, екіншісі — дофамин мен норадреналин нейромедиаторларының деңгейін арттыратын метилфенидат қабылдағаннан кейін. Ми белсенділігі электроэнцефалография (ЭЭГ) — мидың электр сигналдарын тіркеу әдісі арқылы жазылды.
Дәрі қабылдағаннан кейін адамдарда сөйлемнің шынайы мағынасын ашатын негізгі сөзді оқыған сәтте P600 сигналы күшейгені анықталды. Бұл сигнал күрделі грамматиканы өңдеу кезіндегі қосымша ақыл-ой күш-жігерімен байланысты. Айта кетейік, ең күшті әсер бастапқыда жұмыс жадысының көлемі төмен қатысушыларда байқалды.
Жұмыстың тең авторы Петер Хагоорттың айтуынша, бұл жаңалық мидың химиялық заттары грамматикалық байланыстарды құру кезінде ресурстарды бөлуге қатысатынын дәлелдейді.