Qazaqstan Densaýlyq saqtaý mınıstrligi áleýmettik jelilerde medısınalyq joǵary oqý oryndarynyń túlekteri emtıhandy kóptep tapsyra almaǵany týraly taraǵan ósekke qatysty resmı málimdeme jasady, dep habarlaıdy infohub.kz.
Vedomstvonyń baspasóz qyzmetiniń málimdeýinshe, sońǵy kúnderi áleýmettik jelilerde rezıdentýranyń jekelegen túlekteri qorytyndy attestasıanyń ekinshi kezeńiniń nátıjelerine narazylyq bildirgen. «Jappaı óte almaý» týraly aqparatty mınıstrlik qatań túrde joqqa shyǵardy.
Qorytyndy attestasıa nátıjelerine júrgizilgen taldaý kórsetkendeı, túlekterdiń 96,5 paıyzy ekinshi kezeńnen sátti ótken. Emtıhan rásimi, tapsyrmalar mazmuny jáne baǵalaý júıesi Qazaqstan Respýblıkasynyń zańnamasyna tolyq sáıkes kelgen. Ekinshi kezeńge rezıdentýranyń 3684 túlegi qatysyp, onyń 3540-y (96,5%) biliktiligin rastady. Shekti deńgeıden 134 túlek (3,5%) óte almady, ortasha bal 80,7 boldy.
Vedomstvo rezıdentýranyń kópjyldyq praktıkalyq eńbek ekenin (2 jyldan 4 jylǵa deıin oqý) jáne tapsyrýshylardyń joǵary paıyzy qazaqstandyq medısınalyq JOO men klınıkalyq bazalardaǵy daıyndyq sapasynyń halyqaralyq standarttarǵa saı ekenin dáleldeıtinin atap ótti. Salystyrý úshin, Ulybrıtanıada rezıdentýra túlekteriniń qorytyndy emtıhandy sátti tapsyrý kórsetkishi shamamen 60–65 paıyzdy quraıdy.
Sondaı-aq memlekettik tildegi tapsyrmalardyń sapasy boıynsha jeke tekserý júrgizildi. Materıaldar ázirlenip, ózindik mazmundyq jáne lıngvısıkalyq saraptamadan ótkeni anyqtaldy. Beıimdeýsiz sózbe-sóz aýdarý faktileri anyqtalmady.
Aqparattyq júıeni taldaý kórsetkendeı, shekti deńgeıden óte almaǵan túlekterdiń kópshiligi emtıhanǵa bólingen 90 mınýtty tolyq paıdalanbaǵan. Olardyń edáýir bóligi jumysty áldeqaıda erte aıaqtap, jaýaptardy tekserý jáne klınıkalyq jaǵdaıattardy taldaý múmkindigin paıdalanbaǵan.
Árbir túlek emtıhan kezinde aqparattyq júıe arqyly naqty tapsyrmalarǵa shaǵym bere alǵan. Túsken barlyq ótinishter Respýblıkalyq apelásıalyq komısıada belgilengen tártippen qaralýda.
Mınıstrlik syndarly dıalogqa ashyq ekenin jáne árbir ótinishti zań boıynsha qaraýǵa daıyn ekenin málimdedi. Vedomstvo qorytyndy attestasıa formaldylyq emes, qajetti rásim ekenin, óıtkeni erteń túlekter óz betinshe klınıkalyq sheshimder qabyldap, dıagnoz qoıyp, em taǵaıyndap, adamdardyń ómiri men densaýlyǵyna jaýap beretinin atap ótti. Naýqastar sertıfıkat alǵan mamannyń biliktiligine senimdi bolýy tıis.