30 Seconds To Mars tobynyń ánshisi ári akter Djared Leto jańa Assassination («Kisi óltirý») trıllerindegi rólinen aıyryldy. Sebep — sońǵy aptalarda qaıta nazarǵa ilikken seksýaldyq zorlyq-zombylyqqa qatysty kóptegen aıyptaýlar, dep habarlaıdy infohub.kz.
Page Six-tiń málimetinshe, akter 2025 jyly rejıser Barrı Levınsonnyń fılmine qatysý týraly belsendi kelissózder júrgizgen. Kelisim tolyq derlik bekitilgen edi, alaıda prodúserler Letonyń kandıdatýrasynan bas tartýdy jón kórdi.
Joba basshylyǵy aıyptaýlardy kelissózderdiń alǵashqy kezeńinde talqylaǵan bolýy múmkin. Olardyń sany arta túsken soń, stýdıa yntymaqtastyqty jalǵastyrmaý týraly sheshim qabyldady.
Qosymsha faktor retinde Leto basty róldi somdaǵan «Tron: Ares» fılminiń kasasynyń álsizdigi de áser etken bolýy múmkin. Degenmen, derekkózderdiń biriniń pikirinshe, bul akterden bas tartýdy jeńildetken ǵana.
Assassination fılmi AQSh prezıdenti Djon Kennedıdiń ólimin tergegen jýrnalıs Dorotı Kılgallenniń jumbaq jaǵdaıda qaza bolýy týraly baıandaıdy. Kartınadaǵy basty rólderdi Braıan Krenston men Brendan Freızer somdaıdy. Djared Letony kim almastyratyny ázirge belgisiz.
Buǵan deıin Kursiv LifeStyle Djared Letoǵa qatysty BBC-diń tergeýi jarıalanǵannan keıin kámeletke tolmaǵandarǵa qatysty qysym kórsetý aıyptaýlary qaıta qozǵalǵanyn jazǵan.