Kongonyń Býnıa qalasyndaǵy medısına qyzmetkerleri beısenbi kúni jalaqylaryn talap etip narazylyq aksıasyn ótkizdi. Olar birneshe medısınalyq mekemeni tastap ketti. Bul týraly infohub.kz habarlaıdy.
Narazylyq bildirýshiler Itýrı provınsıasynyń ákimshiligi aldyna jınaldy. Aıta keteıik, bul provınsıada eldegi Ebola indetiniń 90 paıyzǵa jýyǵy tirkelgen. Olar jalaqy máselesine baılanysty birneshe apta buryn bastalǵan narazylyqtarǵa qosylǵan sońǵy top bolyp otyr.
Ebola indetine shaldyqqan naýqastarǵa kútim jasaıtyn medbıkelerdi qosa alǵanda, medısına qyzmetkerleri indet mamyr aıynyń ortasynda jarıalanǵannan beri jalaqy men ústemeaqy almaǵandaryn aıtty. Narazylyq bildirýshilerdiń biri Edýıj Makosı: «İsti osylaı basqarsa, bul provınsıada Ebola indeti eshqashan aıaqtalmaıdy. Biz bılikten barlyq deńgeıde aralasyp, tez arada sheshim tabýdy suraımyz», — dedi.
Buǵan deıin sheneýnikter tólemniń keshigýin logıstıkalyq máselelermen túsindirgen bolatyn. Kongo bıligi beısenbi kúni talaptarǵa birden jaýap bermedi. Aldyńǵy qatardaǵy qyzmetkerlerdiń áleýmettik jaǵdaıynyń nasharlyǵy indet kezindegi basty máselelerdiń biri bolyp otyr. Bul — tarıhtaǵy ekinshi iri indet, ol Kongonyń eń shalǵaı jáne osal aımaqtarynyń birinde órship tur. Tólem máselesinen bólek, kóptegen medısına qyzmetkerleri men mekemeler búlikshiler men ashýly tobyrdyń shabýylyna ushyrady.
Dúnıejúzilik densaýlyq saqtaý uıymynyń Bas dırektory Tedros Adhanom Gebreıesýs sársenbi kúni Kongoǵa sapary kezinde bılikti indetpen kúresýshilerge kútim men qoldaý kórsetýge basymdyq berýge shaqyrdy. «Dárigerler shekarasyz» qaıyrymdylyq uıymy bul aptada indettiń «áli de alańdatarlyq jáne buryn-sońdy bolmaǵan qarqynmen taralyp jatqanyn» jáne qabyldanyp jatqan sharalarǵa qaramastan, «juqtyrý tizbegin úzý úshin qaýymdastyqtarǵa jetkilikti jyldam jetpeı jatqanyn» málimdedi.