Batys Qazaqstan oblysyndaǵy «Tasqala» shekara beketinde qujattaryn tekserý kezinde eki pasporty — qazaqstandyq jáne sheteldik pasporty anyqtalǵan áıel ustaldy. Azamattyq týraly zańnamany buzǵanyna qaramastan, oǵan elden shyǵarý sıaqty túbegeıli shara qoldanylmady, dep habarlaıdy infohub.kz saıty.
Batys Qazaqstan oblystyq sotynyń baspasóz qyzmeti túsindirgendeı, ákimshilik isti Tasqala aýdandyq soty qarady. Áıel Qazaqstan Respýblıkasynyń azamattyq týraly zańnamasyn buzǵany úshin aıyptaldy.
«Tasqala» shekara beketinde qujattardy tekserý barysynda áıeldiń Qazaqstan azamatynyń qujattaryn saqtaı otyryp, basqa memlekettiń pasportyn ustaǵany anyqtaldy», — dep keltiredi sot ókilderiniń sózin NUR.KZ.
Elde qoldanystaǵy normalar boıynsha qos azamattyqqa qatań tyıym salynǵan. Basqa memlekettiń pasportyn alǵan kezde azamattar belgilengen merzimde tıisti organdarǵa habarlaýǵa jáne qazaqstandyq qujattaryn tapsyrýǵa mindetti.
Qazaqstan Respýblıkasynyń Ákimshilik quqyq buzýshylyq týraly kodeksiniń osy bap boıynsha sanksıasy ne iri kólemdegi aqshalaı aıyppuldy, ne elden májbúrlep shyǵarýdy kózdeıdi.
Sot otyrysy barysynda quqyq buzýshy óz kinásin tolyq moıyndady.
Sheshim shyǵarý kezinde sot izgilik tanytyp, jeńildetetin mán-jaılardy eskerdi. Áıeldiń jaqyn týystary Qazaqstan aýmaǵynda turaqty turatyndyqtan, sot oǵan deportasıa sıaqty túbegeıli sharany qoldanbaı, ákimshilik aıyppulmen shektelýdi uıǵardy. Bul sheshim otbasynyń birligin saqtaýǵa jáne áıeldi týystarynan ajyratpaýǵa múmkindik berdi.