Qazaqstanda Prjevalskı jylqysynyń sırek kezdesetin popýlásıasy tolyqty: ekinshi qulyn dúnıege keldi, dep habarlaıdy infohub.kz.
Ekologıa jáne tabıǵı resýrstar mınıstrliginiń málimetinshe, ekinshi qulyn halyqaralyq reıntrodýksıa baǵdarlamasy aıasynda elge ákelingen Ýmbra esimdi bıeden týdy. Qazir anasy men qulyny birge, mamandar olardyń jaǵdaıy men minez-qulqyn muqıat baqylap otyr.
Vedomstvonyń aıtýynsha, ekinshi qulynnyń paıda bolýy — Qazaqstanǵa ákelingen Prjevalskı jylqylarynyń dala jaǵdaıyna sátti beıimdelip, tabıǵı jolmen kóbeıe bastaǵanyn kórsetedi. Baǵdarlamanyń basty maqsaty — tabıǵı ortada ózdiginen tirshilik etip, kóbeıe alatyn turaqty popýlásıa qalyptastyrý.
Eske salaıyq, Prjevalskı jylqylaryn (kertaǵy) Qazaqstanǵa qaıtarý 2024 jyly Eýropadan jeti janýar ákelingen kezde bastaldy. 2025 jyly taǵy jeti, al 2026 jyly segiz jylqy ákelindi.
Prjevalskı jylqysy — Eýrazıadaǵy jabaıy jylqylardyń sońǵy saqtalǵan túri. HH ǵasyrda ol tabıǵatta joıylyp ketti, biraq haıýanattar baǵynda ósirý arqyly túrdi saqtap qalýǵa múmkindik týdy. Keıin bul jylqylardy tarıhı mekenderine qaıtara bastady, al Qazaqstan osyndaı jumys júrgizilip jatqan elderdiń birine aınaldy.
Prjevalskı jylqysynyń alǵashqy qulyny 22 tamyzda «Altyn Dala» memlekettik tabıǵı rezervaty aýmaǵyndaǵy «Alıbı» reıntrodýksıa ortalyǵynda dúnıege kelgen edi.