Birneshe jyl qatarynan qarqyndy ósken Qytaıdyń elektromobıl naryǵy báseńdeı bastady: 2026 jyldyń alǵashqy jeti aıynda batareıalyq kólikterdiń satylymy ótken jyldyń sáıkes kezeńimen salystyrǵanda 14%-ǵa tómendedi, dep habarlaıdy infohub.kz saıty.
Qytaıdyń jeńil kólikter qaýymdastyǵynyń (CPCA) derekteri boıynsha, jyl basynan beri Qytaıda shamamen 4,7 mln elektromobıl satylǵan. Suranystyń tómendeýine iri óndirýshiler de tap boldy. Shildede BYD ishki naryqta 239,3 myń kólik satty — bul byltyrǵymen salystyrǵanda 9%-ǵa az, alaıda maýsymmen salystyrǵanda satylym 4,9%-ǵa ósken. Geely-de jaǵdaı uqsas: maýsymmen salystyrǵanda satylym 4%-ǵa ósti, biraq jyldyq kórsetkishte 29,1%-ǵa tómendedi. Bul quldyraý Xpeng, Nio jáne Li Auto-ǵa da áser etti.
Sebepterdiń biri — memlekettik sýbsıdıalardyń qysqarýy. Buryn jańa kólik satyp alýshylar 15 myń ıýán kóleminde tólem ala alatyn. Endi ótemaqy kólik qunynyń 10%-yn quraıdy, biraq 10 myń ıýánnan (shamamen 1 mln teńge) aspaıdy. Eń qoljetimdi elektromobılder úshin bul qoldaýdyń shamamen 5 myń ıýánǵa azaıýyn bildiredi. Ekonomıkanyń baıaýlaýy men avtokólik óndirýshiler arasyndaǵy baǵa soǵysy qosymsha qysym jasaýda. Ekinshi toqsanda Qytaıdyń JİÓ 4,3%-ǵa ósti — bul 2022 jyldyń sońynan bergi eń tómengi kórsetkish.
Qazaqstandaǵy kólik baǵasyna áseri týraly aıtý áli erte. Sonymen qatar, Carscoops atap ótkendeı, dál qazir eksport BYD men Geely-ge otandyq naryqtaǵy satylymnyń tómendeýin óteýge kómektesýde. Eger bul úrdis jalǵasa, sheteldik naryqtar qytaılyq óndirýshiler úshin odan da mańyzdy bola túsedi. Bolashaqta bul Qazaqstandaǵy kólik baǵasy men qoljetimdiligine áser etýi múmkin. Qytaı brendteriniń jergilikti naryqtaǵy úlesi artyp kele jatqandyqtan, jaǵdaıdyń damýyn qadaǵalaý mańyzdy.