25 tamyzdan bastap Qazaqstanda elektrosamokattarǵa qatysty jańa erejeler kúshine endi. Bul azamattar tarapynan kóptegen suraq týdyrdy. Bas prokýratýra engizilgen talaptardy túsindirip berdi, dep habarlaıdy infohub.kz saıty.
Qadaǵalaý organynyń Telegram-arnasynda atap ótilgendeı, zańnamaǵa ózgerister elektrosamokattar, mopedter, velosıpedter jáne basqa da jeke utqyrlyq quraldary qatysqan jol apattarynyń ósýine baılanysty engizildi. Alańdatarlyq statısıka keltirilgen: jyl basynan beri moped júrgizýshileriniń kinásinen 390 jol-kólik oqıǵasy tirkelip, 33 adam qaza taýyp, 461 adam jaraqat aldy. Velosıpedshilerdiń kinásinen 169 apat bolsa, shaǵyn elektr kólik quraldarynyń júrgizýshileri — 97, elektrosamokattar — 47 apatqa ushyrady. Osy oqıǵalardyń barlyǵynda 329 kámeletke tolmaǵan zardap shekti, 10 bala qaza tapty.
Sonymen qatar, mundaı kólik quraldaryn paıdalanýshylardyń ózderi de jol apatynyń qurbany bolyp jatady. Elektrosamokat júrgizýshilerine 145, moped júrgizýshilerine 82, shaǵyn elektr kólik quraldarynyń júrgizýshilerine 52 ret soqqy jasalǵany tirkelgen. Bul oqıǵalar tórt adamnyń ómirin qıdy, taǵy 300-ge jýyq adam ártúrli jaraqat aldy.
Osyǵan baılanysty 25 tamyzdan bastap elektrosamokattardyń trotýarlar men jaıaý júrginshiler jolynda júrýine tyıym salynady. Velosıped joly nemese velosıped jolaǵy bolsa, qozǵalys tek solarmen júzege asyrylýy kerek, al olar bolmaǵan jaǵdaıda — jol qozǵalysy erejelerine sáıkes júris bóliginiń oń jaq shetimen nemese jol jıegimen júrýge bolady.
Sondaı-aq, júris bóliginde qozǵalýǵa tek 18 jastan asqan, tıisti sanattaǵy júrgizýshi kýáligi bar jáne qorǵanys dýlyǵasyn kıgen adamdarǵa ruqsat etiletinin este saqtaý qajet. Moped júrgizýshileri tek júris bóliginde júrýge mindetti, al jaıaý júrginshiler ótkelinen ótkende samokat, velosıped jáne moped ıeleri túsip, kólik quralyn janynda jeteleýi tıis. Jolaýshylardy tasymaldaýǵa, rúldi ustamaı telefonmen sóılesýge, sondaı-aq qarańǵyda jaryq shaǵyldyrǵysh elementtersiz júrýge tyıym salynady.
Adamdar kóp jınalatyn jerlerde joǵary jyldamdyqpen qozǵalý erekshe qaýip tóndiredi. Eń aldymen balalar, qart adamdar jáne koláskamen júretin ata-analar qaýip aımaǵynda bolady. Dymqyl asfált, metal lúkter men plıtka jabyndylary da qaýipti, óıtkeni dóńgelekterdiń jolmen ilinisýi aıtarlyqtaı tómendeıdi. Ár sapar aldynda kólik quralynyń jaramdylyǵyn tekserip, qorǵanys quraldaryn kıip, júrý kezinde alańdamaý qajet.
Avtomobıl júrgizýshileri de erekshe muqıat bolýy kerek. Qıylystardan, aýla aýmaqtarynan, jaıaý júrginshiler ótkelderinen jáne samokat pen velosıped paıdalanýshylardyń paıda bolýy múmkin jerlerden ótkende jyldamdyqty báseńdetip, jol jaǵdaıynyń kútpegen ózgeristerine daıyn bolý qajet.
Kámeletke tolmaǵandar qatysqan jol apattary erekshe alańdaýshylyq týdyrady. Ata-analar balalaryna jas kezinen jol qozǵalysy erejelerin úıretip, olardyń samokat pen velosıped paıdalanýyn baqylap, zańmen tyıym salynǵan jaǵdaıda kólik quraldaryn basqarýǵa jol bermeýi tıis.
«Samokat endi oıyn-saýyq emes», — dep eskertti qazaqstandyqtarǵa.