Qazaqstanda elektrvelosıpedter qýatyna qaramastan mopedke teńestirildi. Demek, olarmen trotýarmen júrý — zań buzýshylyq. Bul týraly úkimettegi brıfıńte ishki ister vıse-mınıstri Igor Lepeha málimdedi, dep habarlaıdy NUR.KZ tilshisi, infohub.kz saıtyna silteme jasap.
Jýrnalıser osy kólik túri ásirese jasóspirimder men balalar arasynda keń taraǵanyna nazar aýdaryp, mundaı qurylǵylardyń jyldamdyǵy saǵatyna 30 kılometrge jetetinin eskerip, olardyń trotýarmen júrýi qanshalyqty zańdy ekenin surady.
«Biz bul máseleni rettep qoıdyq. Elektrvelosıpedter qýatyna qaramastan mopedke teńestirildi, ıaǵnı qazir elektrvelosıpedpen trotýarmen júrýge bolmaıdy, bul — zań buzýshylyq. Bul norma zań júzinde bekitilgen. Biz olardy da moped ıeleri sıaqty jaýapkershilikke tartamyz», — dedi Igor Lepeha.
Eske salaıyq, 1 shildeden bastap Qazaqstanda elektrsamokattarmen júrýdiń jańa erejeleri kúshine endi. Jas shekteýi, kýálik pen saqtandyrý talaptary engizildi.
Alaıda sol kezde İshki ister mınıstrligi elektrsamokat júrgizýshilerine taǵy bir qatańdyqty — 25 tamyzdan bastap trotýarlar men jaıaý júrginshi joldarymen júrýge tyıym salynatynyn jarıalaǵan bolatyn.
Buryn trotýarmen saǵatyna 6 kılometrden aspaıtyn jyldamdyqpen júrýge ruqsat etilse, endi elektrsamokattarmen tek velosıped joldarymen nemese velosıped jolaqtarymen, al olar bolmaǵan jaǵdaıda júris bóliginiń oń shetimen, jol jıegimen júrýge bolady.