Germanıanyń Halbershtadt qalasyndaǵy ortaǵasyrlyq shirkeýde kompozıtor Djon Keıdjdiń 639 jylǵa eseptelgen týyndysy aıasynda kezekti akord aýystyryldy, dep habarlaıdy infohub.kz.
Áýlıe Býrkardı shirkeýinde ASLSP (As Slow as Possible — «Múmkindiginshe baıaý») mýzykalyq jobasy aıasynda jańa nota oryndaldy. Amerıkandyq avangard kompozıtory Djon Keıdj jazǵan bul týyndy arnaıy jasalǵan organda 2001 jyly oryndala bastady. Bul erekshe konsert tek 2640 jyly aıaqtalýy tıis.
Dybystyń ózgerýi álemniń túkpir-túkpirinen zamanaýı mýzyka jankúıerlerin tartady. Akordty ózgertý úshin mýzykanttar men ınjenerler qum salynǵan qaptardy qolmen qosyp nemese alyp tastaıdy, organnyń pedaldaryn basady nemese qubyrlardy aýystyrady. Osy ýaqytqa deıin aspaptyń dybysy 2024 jyldyń aqpanynan beri ózgermegen bolatyn, sonda aldyńǵy nota ornatylǵan edi.
Joba avtorlary týyndy alty ǵasyrdan astam ýaqyt boıy úzdiksiz oryndalyp, árbir akord aýystyrý sırek kezdesetin mádenı oqıǵaǵa aınalady dep esepteıdi. Halbershtadttegi organnyń mýzykalyq úndestigi kelesi joly tek 2028 jyly ózgeredi.