Qazaqstanda 2026 jylǵa belgilengen 69 049 teńge kólemindegi eń tómengi zeınetaqyǵa memlekettik bazalyq zeınetaqy tólemi kirmeıdi — ol bólek eseptelip, taǵaıyndalady. Bul týraly Eńbek jáne halyqty áleýmettik qorǵaý mınıstrliginiń Halyqty áleýmettik qorǵaý salasyn retteý jáne baqylaý komıteti habarlady, dep jazady infohub.kz saıty.
Vedomstvonyń túsindirýinshe, eńbek ótili 1998 jylǵy 1 qańtarǵa deıin jınalǵan azamattarǵa yntymaqty zeınetaqy taǵaıyndalady. Oǵan qosa olar bazalyq zeınetaqy tólemin alady, onyń mólsheri ótiline baılanysty.
2026 jyly eń tómengi bazalyq tólem eń tómengi kúnkóris deńgeıiniń 70 paıyzyn, ıaǵnı 35 596 teńgeni quraıdy. Eń joǵary mólsheri eń tómengi kúnkóris deńgeıiniń 118 paıyzyna, ıaǵnı 60 005 teńgege jetedi. Yntymaqty jáne bazalyq bólikterden bólek, zeınetkerge Biryńǵaı jınaqtaýshy zeınetaqy qorynan (BJZQ) jınaqtary esebinen tólemder taǵaıyndalýy múmkin.
Zeınetkerlerdiń qorytyndy somalary ártúrli, sebebi olar eńbek ótiliniń uzaqtyǵyna, jalaqyǵa jáne BJZQ-daǵy jınaq kólemine baılanysty.
2027 jylǵy 1 qańtardan bastap jasyna baılanysty zeınetaqy tólemderi boljam boıynsha 8,5 paıyzǵa ósedi. Indeksteýdiń túpkilikti mólsheri respýblıkalyq búdjet týraly zańmen bekitilýi tıis. Eger tólem 100 myń teńge bolsa, 8,5 paıyzǵa óskennen keıin ol 108,5 myń teńgege deıin artady.
Zeınetke shyǵatyn azamattarǵa shamamen bir jyl buryn eńbek kitapshasyn tekserý usynylady. Onda eńbek qyzmeti týraly tolyq ári durys jazbalar, uıymdardyń mórleri, jumysqa qabyldaý jáne jumystan shyǵarý týraly buıryqtardyń málimetteri, sondaı-aq tıisti kúnder bolýy kerek.
Qujattardy óz betinshe, turǵylyqty jeri boıynsha Memlekettik korporasıa bólimshesinde nemese Halyqty áleýmettik qorǵaý salasyn retteý jáne baqylaý komıtetiniń aýmaqtyq departamentinde tekserýge bolady.
Buǵan deıin «Kýrsıv» 2027 jylǵy 1 qańtardan bastap zeınetaqy jınaqtarynyń saqtalýyna memlekettik kepildik tek BJZQ-ǵa naqty salynǵan qarajatqa ǵana qoldanylatynyn, al ınvestısıalyq tabysqa qoldanylmaıtynyn jazǵan bolatyn.