Álemge áıgili ánshi Enrıke Iglesıastyń 3 qyrkúıekte elordada ótetin kópten kútken konserti qarsańynda Astana ákimdigi qala turǵyndaryna mańyzdy habarlamamen úndeý jasady, dep habarlaıdy infohub.kz saıty.
Ákimdiktiń baspasóz qyzmeti konserttiń saǵat 20:00-de bastalatynyn eske saldy. Kórermenderge qolaıly jaǵdaı jasaý jáne kólik júktemesin azaıtý úshin sol kúni arnaıy shattl-baǵyttar uıymdastyrylady. Avtobýstar saǵat 16:00-den bastap qalanyń tórt núktesinen «Astana Arena» stadıonyna deıin, sondaı-aq is-shara aıaqtalǵan soń keri baǵytta jolaýshylardy jetkizýdi qamtamasyz etedi.
Arnaıy kólik qozǵalysynyń baǵyttaryna myna turaqtar kiredi: elordalyq sırk mańy, «Hazret Sultan» meshiti, Qajymuqan kóshesindegi «Qazaqstan» sport kesheni jáne «Nur-Sultan» meshiti (bas meshit).
«Shattl-bastar eki baǵytta da – konsert bastalǵanǵa deıin jáne ol aıaqtalǵannan keıin qatynaıdy. Qosymsha shattl-baǵyttardyń iske qosylýy joldardyń shamadan tys júktelýin boldyrmaýǵa múmkindik beredi jáne elordanyń barlyq turǵyndary úshin jaıly júrip-turý jaǵdaıyn qamtamasyz etedi», – delingen resmı habarlamada.
Sonymen qatar, kórermender konsert ótetin orynǵa tez ári yńǵaıly jetýge múmkindik beretin «Tarlan Astana» jeńil relsti kóligin paıdalana alady.
Eske sala keteıik, naýryz aıynda Enrıke Iglesıas Qazaqstanda eki konsert beretinin málimdegen bolatyn: Almaty men Astanada. Almatydaǵy óner kórsetý 5 qyrkúıekke josparlanǵan.