Qazaqstan Respýblıkasynyń Mádenıet jáne aqparat vıse-mınıstri bolyp Erjan Toqtaǵulov taǵaıyndaldy. Osyǵan deıin ol osy vedomstvonyń departamentteriniń birin basqarǵan edi, dep habarlaıdy infohub.kz saıty.
QR Úkimetiniń qaýlysymen Erjan Dáýletuly Toqtaǵulov Mádenıet jáne aqparat vıse-mınıstri laýazymyna bekitildi. Ol 1992 jyly Jambyl oblysynda dúnıege kelgen. L.N. Gýmılev atyndaǵy Eýrazıa ulttyq ýnıversıtetin, Qaztutynýodaǵy Qaraǵandy ekonomıkalyq ýnıversıtetin, QR Prezıdenti janyndaǵy Memlekettik basqarý akademıasyn jáne Halyqaralyq kólik-gýmanıtarlyq ýnıversıtetin bitirgen. Prezıdenttik jastar kadr rezerviniń múshesi.
Toqtaǵulovtyń eńbek joly 2015 jyly bastaldy: 2015–2018 jyldary QR Ulttyq ekonomıka mınıstrliginiń qurylymynda bas maman, sarapshy bolyp jumys istedi. 2018–2019 jyldary — QR Aqparat jáne komýnıkasıalar mınıstrligi Telekomýnıkasıalar komıtetiniń Baılanys salasyndaǵy baqylaý basqarmasynyń bas sarapshysy. 2019 jyly — «Qazaqstan ındýstrıasyn damytý ınstıtýty» Eksporttaýshylardyń shyǵynyn óteý ortalyǵynyń dırektory.
2019–2020 jyldary QR Aqparat jáne qoǵamdyq damý mınıstrligi Aqparat komıtetiniń BAQ salasyndaǵy baqylaý basqarmasynyń basshysy mindetin atqardy. 2020–2021 jyldary — Qostanaı oblysy ákimdiginiń Eńbek ınspeksıasy basqarmasynyń basshysy – Qostanaı oblysy boıynsha bas memlekettik eńbek ınspektory. 2021–2024 jyldary QR Sıfrlyq damý, ınovasıalar jáne aeroǵarysh ónerkásibi mınıstrliginiń Óńiraralyq baılanys ınspeksıasyn basqardy.
2024 jyldyń naýryzynan bastap taǵaıyndalǵanǵa deıin QR Mádenıet jáne aqparat mınıstrliginiń Sıfrlyq transformasıa jáne jobalyq menedjment departamentiniń dırektory qyzmetin atqardy.