Almaty qalasy men Almaty oblysynda polısıa qyzmetkerleri esirtki taratýdyń kezekti arnalaryn joıdy, dep habarlaıdy infohub.kz saıty.
İİM-niń esirtki qylmysyna qarsy is-qımyl komıteti basqarmasynyń bastyǵy Baqytjan Ámirhanov málimdedi. Onyń aıtýynsha, Almatyda polıseıler 33 jastaǵy er adamdy ustady, onyń kóligin tekserý kezinde untaq tárizdi zat salynǵan 130 orama tabylyp, alyndy.
«Kúdiktiniń turǵylyqty jerin tekserý barysynda esirtki zattary, elektrondy tarazy, oraý materıaldary jáne tyıym salynǵan zattardy qaptaýǵa arnalǵan basqa da zattar alyndy», — dedi Ámirhanov.
Sondaı-aq Almaty oblysynda esirtkiniń úlken partıasy jasyrylǵan taǵy bir qoıma anyqtaldy. «Alynǵan zattyń jalpy kólemi eki keli mefedrondy qurady, bul 10 myń bir rettik dozaǵa teń. İri partıa esirtki tutynýshylarǵa jetpedi», — dep atap ótti basqarma bastyǵy.
İİM-de ustalǵan adam kinásin moıyndaǵanyn aıtty. Atalǵan fakti boıynsha QR QK-niń 297-babymen sotqa deıingi tergeý bastaldy, endi kúdikti narkokýrerge 12 jylǵa deıin bas bostandyǵynan aıyrý jazasy qaýip tónip tur. Ol ýaqytsha ustaý ızolátoryna qamaldy.
«İİM esirtki taratý áreketterin qatań túrde toqtatady. Bul baǵyttaǵy jumys jalǵasýda», — dedi Ámirhanov.