Fransıanyń Issýar qalasynda belgisiz bireýler Salvador Dalı jasaǵan «Apokalıpsıs kitabynyń» qola muqabasyn urlap ketti. Bul týraly infohub.kz saıty habarlady.
The Telegraph dereginshe, týyndy Issýardaǵy Zamanaýı óner ortalyǵynan joǵalǵan. Muqaba altynmen, asyl tastarmen jáne qabyrshaqtarmen bezendirilgen. Klermon-Ferran prokýratýrasy bul jumysty «erekshe ári biregeı» dep atap, onyń quny óte joǵary ekenin atap ótti.
Tek muqabanyń salmaǵy 150 keli, al kitaptyń ózi shamamen 210 keli tartady. Qylmyskerlerdiń sonshalyqty aýyr zatty qalaı alyp shyqqany ázirge belgisiz. Polısıa murajaıdy buzýǵa týra kelgen-kelmegenin de habarlaǵan joq.
Issýar meri Bertran Barro bul joǵaltýdy «baǵa jetpes» dep atady. «Bul — ómir boıy jasalǵan eńbek», — dedi ol.
Týyndynyń ıesi Krıstıan Karýtzos urlyq Fransıanyń mádenı murasyna soqqy bolǵanyn málimdedi. «Olar keshe túnde Fransıany óltirdi, olar fransýz murasyn óltirdi», — dedi ol jergilikti radıoǵa.
«Apokalıpsıs kitaby» 1958 jyly baspager Jozef Foreniń oıynan shyqqan. Ony jasaýǵa 14 tanymal sýretshi men jazýshy qatysty, olardyń qatarynda Jan Kokto, Bernar Búffe jáne Jan Jıono bar. Dalı basylym úshin qola muqaba jasady.
Týyndynyń ózi 150 úlken pergament paraǵynan turady. Kallıgrafıalyq jumysqa shamamen 2 myń saǵat ketken, al 550 árip altynmen jazylǵan.
Tergeýdi Klermon-Ferran jandarmerıasynyń tergeý brıgadasy júrgizip jatyr. Urlyq fransýz murajaılaryna jasalǵan birqatar shabýyldyń aıasynda boldy.
Ótken jyldyń qazanynda Lývrdan quny shamamen 88 mln eýro bolatyn fransýz tájiniń asyl buıymdary urlanǵan. Shildede Lalık murajaıynan 4,5 mln eýro turatyn 27 zat alynsa, qyrkúıekte Renýar murajaıynan tórt kartına urlandy.