Freedom Holding Corp. zańgerleri Reseı Federasıasy Bas prokýratýrasy bergen ákimshilik talap-aryzdy zerdeleýge kiristi. Bul týraly holdıńtiń baspasóz qyzmeti málimdedi, dep habarlaıdy infohub.kz saıty.
«Reseı Federasıasynyń aýmaǵynda qyzmet júrgizbeımiz, aktıvterimiz joq. Osy isti zerdelep, materıaldarymen tanysyp jatyrmyz. Túsiniksizdik bildiremiz», — dedi Freedom Holding baspasóz qyzmeti.
Máskeýdiń Tver aýdandyq sotynyń kartotekasyndaǵy derekterge qaraǵanda, ákimshilik talap-aryz aǵymdaǵy jyldyń 24 qyrkúıeginde tirkelgen. İs boıynsha talap qoıýshy — Reseı Federasıasy Bas prokýrorynyń orynbasary. Alaıda talaptyń máni ashylmaı otyr.
Ákimshilik jaýapkerler retinde W-Empirical Holding Corp., Freedom Holding Corp. jáne Freedom Finance Europe Ltd. kompanıalary kórsetilgen. İs boıynsha jaýapkerler qatarynda jeke tulǵalar — Tımýr Týrlov jáne A.S. Shýkın de bar. İsti qaraýǵa daıyndyq aıaqtaldy, taraptardyń aldyn ala áńgimelesýi 2026 jylǵy 15 qazanǵa belgilengen.
W-Empirical Holding Corp. buqaralyq aqparat quraldarynda 2025 jyldyń sáýirinde atalǵan bolatyn. Onda Máskeýdiń Tver aýdandyq soty ınvestor Sergeı Kýleshevke sheteldik aksıalardyń qunyn manıpýlásıalaý isi boıynsha úsh jyl bas bostandyǵynan aıyrý jazasyn shartty túrde taǵaıyndaǵany habarlanǵan. Tergeý nusqasy boıynsha, ol sybaılasymen birge W-Empirical Holding Corp. qarjy kompanıasynyń saýda robotyn jańylystyrǵan. Sot sondaı-aq W-Empirical Holding Corp.-tyń azamattyq talabyn qanaǵattandyryp, Kýleshevten 162 mln rúblge jýyq somany óndirip alýǵa úkim shyǵarǵan. Bul soma onyń sybaılasymen birge jalǵan mámilelerden alǵan tabysyna sáıkes keledi. Qaryzdy óteýdi qamtamasyz etý úshin Kýleshevtiń jyljymaıtyn múlki men barlyq shottaryna tyıym salynǵan.
2022 jyldyń qazanynda «Kýrsıv» Freedom Holding «Frıdom Fınans» ınvestısıalyq kompanıasyn jáne «Frıdom Fınans» banki» JSHQ-syn «Frıdom Fınans» ınvestısıalyq kompanıasynyń burynǵy bas dırektorynyń orynbasary jáne dırektorlar keńesiniń múshesi Maksım Povalıshınge satqanyn habarlaǵan. Holdıń reseılik aktıvterden shyqqan.
Freedom Holding bas dırektory Tımýr Týrlov 2022 jyly AQSh rezıdentterine Reseıge kez kelgen ınvestısıa salýǵa tyıym salynǵandyqtan, reseılik bıznesti amerıkandyq holdıń ishinde saqtaý múmkindigin kórmeıtinin aıtqan.
Freedom Holding Corp. — AQSH-tyń Nevada shtatynda tirkelgen halyqaralyq qarjy toby. Toptyń negizgi naryǵy Qazaqstan bolyp qala beredi, shtab-páteri Almatyda ornalasqan. Holdıń brokerlik, banktik, saqtandyrý jáne tólem bıznesin, sondaı-aq telekomýnıkasıalyq, medıalyq jáne basqa da sıfrlyq servısterdi damytyp keledi. Freedom Holding Corp. aksıalary Nasdaq-ta FRHC tıkerimen, sondaı-aq Qazaqstan qor bırjasynda (KASE) jáne Astana halyqaralyq bırjasynda (AIX) saýdalanady.