Bıylǵy tamyzda Qazaqstanda bólý jelileri arqyly jetkiziletin gaz baǵasy aıtarlyqtaı ósti. Ulttyq statısıka búrosynyń derekterine sáıkes, bir aı ishinde bul otyn túrine tarıfter orta eseppen 29,5%-ǵa qymbattady — bul barlyq komýnaldyq qyzmetter arasyndaǵy eń baıqalarlyq ósim boldy. Al qalǵan turǵyn úı-kommýnaldyq qyzmetterdiń baǵasy shamaly — 1%-ǵa deıin ǵana ósti, dep habarlaıdy infohub.kz saıty.
Eldegi jyldyq ınflásıa tamyz qorytyndysy boıynsha 9,8%-ǵa deıin tómendedi — bul sońǵy bir jarym jyldaǵy eń tómengi kórsetkish. Degenmen, kóptegen taýarlar men qyzmetter áli de bir jyl burynǵydan aıtarlyqtaı qymbat. Bul ásirese gazǵa qatysty: jyl basynan beri onyń quny 34,9%-ǵa, al jyldyq mánde 20%-ǵa ósti.
Qalǵan komýnaldyq qyzmetter arasynda bir aı ishinde tek shamaly ósim baıqaldy: ystyq sý 1%-ǵa, elektr energıasy 0,9%-ǵa, sýyq sý 0,5%-ǵa qymbattasa, úıdi kútip-ustaý tarıfteri 0,6%-ǵa ósti. Al káriz júıesi 0,1%-ǵa arzandady, jylý men qoqys shyǵarý quny ózgergen joq.
Jyldyq kórsetkishte komýnaldyq qyzmetterdiń baǵa dınamıkasy bylaısha kórinedi: sýyq sý 40,9%-ǵa arzandady, ortalyq jylý 0,1%-ǵa, qoqys shyǵarý 0,7%-ǵa, káriz 1,5%-ǵa, ystyq sý 3,6%-ǵa, elektr energıasy 4,0%-ǵa, úıdi kútip-ustaý 5,6%-ǵa, al gaz 20,0%-ǵa qymbattady.
Osylaısha, barlyq komýnaldyq qyzmetter arasynda tek gaz bir aı ishinde de, bir jyl ishinde de aıtarlyqtaı qymbattady, al qalǵan qyzmetterdiń baǵasy qalypty qarqynmen ósýde. Buǵan deıin Qazaqstannyń qaı óńirinde taýarlar men qyzmetter baǵasy eń kóp óskeni týraly habarlaǵan bolatynbyz.