Palestınalyq resmı ókilderdiń málimetinshe, Gazadaǵy túngi soqqylar turǵyn úılerge tıip, keminde segiz adam qaza tapty. Gazanyń Azamattyq qorǵanys basqarmasy Izraıl áskerı ushaqtary Gaza qalasyna, Han-Únıs pen Deır-el-Balahqa soqqy bergenin habarlady. Izraıl qorǵanys kúshteriniń (SAHAL) ókili áskerı qyzmetkerlerge baǵyttalǵanyn, eki HAMAS jaýyngeriniń joıylǵanyn málimdedi.
Bul — Izraıl áskeriniń anklavqa qarsy qatarynan ekinshi túngi soqqysy. Buǵan deıin HAMAS qarýsyzdaný josparyn qabyldaǵan bolatyn, oǵan sáıkes palestınalyq top qarý-jaraǵyn AQSh prezıdenti Donald Tramptyń Beıbitshilik keńesine tapsyrýy tıis. Izraıldiń energetıka mınıstri Elı Koen jeksenbide Gaza sektoryna shabýyldardy toqtatý týraly kelisimge qol jetkizilmegenin, qazir bul aýmaqtyń 70%-y Izraıl baqylaýynda ekenin aıtty. Reuters agenttiginiń habarlaýynsha, Koen HAMAS qarýsyzdanbasa, sektordy Izraıldiń tolyq baqylaýyna alý qajettigin, Beıbitshilik keńesiniń Izraıldiń aýmaqtan shyǵý josparyna qaramastan, qajet dep sanaıtynyn jetkizdi.
SAHAL jeksenbide X áleýmettik jelisindegi jazbasynda eki HAMAS komandırin joıǵanyn habarlady: biri — elıtalyq Nýkba kúshinen, ekinshisi — Magazı batalónynan. Palestınalyq densaýlyq saqtaý ókilderi Gaza qalasyndaǵy turǵyn úıge jasalǵan soqqyda eki adam, onyń ishinde bir bala qaza tapqanyn, al soltústiktegi Djabalıa mańynda taǵy bir adam qaza tapqanyn málimdedi. Han-Únıstegi úıge jasalǵan soqqyda áke, ana jáne olardyń toǵyz jasar uly qaza tapty, al Deır-el-Balahtaǵy páter úıine jasalǵan soqqyda bir er adam men bir áıel qaza tapty. Ótken qazan aıynda atysty toqtatý rejımi kúshine engennen beri 1100-den astam palestınalyq qaza tapty.