Qazaqstan Ulttyq olımpıadalyq komıtetiniń tóraǵasy ári World Boxing halyqaralyq federasıasynyń prezıdenti Gennadı Golovkın ýkraındyq «Mırotvores» saıtynyń derekqoryna engizildi. Ataqty qazaqstandyq boksshynyń profıli resýrsta 15 tamyzda paıda boldy, dep habarlaıdy infohub.kz.
Saıt uıymdastyrýshylary World Boxing basshysyn «reseılik agresıany ashyq qoldady» dep aıyptady. Buǵan federasıanyń basqarý organynyń reseılik jáne belarýstik sportshylarǵa qatysty barlyq shekteýlerdi tolyq alyp tastaý týraly sheshimi sebep boldy.
Bıylǵy shildede World Boxing uıymy Reseı men Belarýs boksshylaryna barlyq jastaǵy halyqaralyq týrnırlerge óz elderiniń rámizderimen qatysýǵa ruqsat berdi. Eske salaıyq, dál osy halyqaralyq qurylym olımpıadalyq boksty basqarady jáne 2028 jylǵy Olımpıada oıyndaryna irikteý jarystaryn ótkizedi.
World Boxing atqarý komıtetiniń resmı málimdemesinde reseılik sportshylar basqa elderdiń boksshylarymen teń dárejede jarystarǵa qatysatyny, alaıda uıym olardyń minez-qulqy men antıdopıngtik hattamalardyń saqtalýyn qatań baqylaýdy jalǵastyratyny atap ótildi.
««Mırotvores» ortalyǵy quqyq qorǵaý organdarynan saıttaǵy bul jarıalanymdy azamattyń Ýkraınanyń ulttyq qaýipsizdigine, beıbitshilikke, adamzat qaýipsizdigine jáne halyqaralyq quqyqtyq tártipke qarsy sanaly áreketter jasaǵany týraly málimdeme retinde qarastyrýdy suraıdy», — delingen Golovkınniń ýkraındyq resýrstaǵy kartochkasynda.
Sportshylardy qaıtarý prosesi kóktemde bastalǵan edi. Naýryzda World Boxing atqarý keńesi Reseı men Belarýs boks federasıalarynyń uıymǵa kirý týraly ótinimderin maquldap, sodan keıin sportshylardy qabyldaý sharttary boıynsha túsinikteme alý úshin Halyqaralyq olımpıadalyq komıtetke (HOK) suraý jiberdi.
Gennadı Golovkın World Boxing-ti 2025 jylǵy 23 qarashadan bastap basqarady. Jarıalanym kezinde boksshynyń ózinen, Qazaqstan UOK-nen nemese World Boxing ókildiginen «Mırotvores» bazasyna engizilýine qatysty resmı túsiniktemeler túsken joq.
«Mırotvores» — 2014 jyly qurylǵan ýkraındyq ınternet-resýrs, ol belsendiler Ýkraınanyń ulttyq qaýipsizdigine qaýip retinde baǵalaıtyn adamdar týraly málimetterdi engizetin beıresmı jurtshylyq derekqory bolyp tabylady. Portalda joba avtorlarynyń narazylyǵyn týdyrǵan búkil álemdegi qoǵam qaıratkerleriniń, saıasatkerlerdiń, jýrnalıserdiń jáne sportshylardyń jeke derekteri jarıalanady. Birqatar elderdiń bıligi men halyqaralyq quqyq qorǵaý uıymdary saıtty jeke derekterdi jarıalaǵany jáne quqyqtyq ashyqtyqtyń joqtyǵy úshin birneshe ret synǵa aldy.