Qazaqstanda alǵash ret rezıdentýra granttary sıfrlyq platforma arqyly bólindi. Densaýlyq saqtaý mınıstrligi 2026–2027 oqý jylyna arnalǵan bilim granttary baıqaýynyń qorytyndysyn shyǵardy, dep habarlaıdy infohub.kz saıty.
Alǵash ret 2,5 myń bolashaq dáriger-rezıdentti irikteý tolyǵymen avtomattandyrylǵan rejımde «Rezıdentýranyń sıfrlyq platformasy» arqyly ótti. Barlyǵy 12,5 myńnan astam ótinish túsip, onyń 8,5 myńnan astamy 2,5 myń bilim grantyna baıqaýǵa jiberildi.
Nátıjesinde 2 384 grant bólindi. Qalǵan ıgerilmegen 116 grantqa 27-28 tamyzda qosymsha baıqaý jarıalanady, onyń qorytyndysy 29 tamyzda aıtylady.
2026–2027 oqý jylyna memlekettik tapsyrys rezıdentýranyń 57 mamandyǵy boıynsha qalyptastyryldy. Atap aıtqanda, akýsherlik jáne gınekologıa boıynsha 231 oryn, anestezıologıa jáne reanımatologıa boıynsha 148, jalpy hırýrgıa boıynsha 140, terapıa boıynsha 122, pedıatrıa boıynsha 113, onkologıa boıynsha 111, kardıologıa boıynsha 102, radıologıa boıynsha 86, nevrologıa boıynsha 84 jáne neonatologıa boıynsha 75 oryn qarastyrylǵan.
Memlekettik granttardyń eń kóp kólemi respýblıkanyń S.D. Asfendıarov atyndaǵy QazUMÝ — 517 grant, Astana medısına ýnıversıteti — 332, Semeı medısına ýnıversıteti — 297, M. Ospanov atyndaǵy BQMÝ — 290, Qaraǵandy medısınalyq joǵary oqý orny — 212 sıaqty medısınalyq JOO-lary arasynda bólindi.
Sonymen qatar, 12-17 tamyz aralyǵynda ákimdik granttaryna baıqaýǵa ótinimder qabyldandy. 2026 jyly 18 óńir (Túrkistan oblysy men Shymkent qalasynan basqa) barlyǵy 900 grant bóldi.
Bir mezgilde aqyly oqýǵa ótinimder qabyldanýda. Qujattardy 25 tamyzǵa deıin 1 337 orynǵa tapsyrýǵa bolady. Nátıjeler 27 tamyzda jarıalanady.
Buǵan deıin túlekter tarapynan bolǵan qyzý qyzyǵýshylyq pen suraqtar aıasynda Densaýlyq saqtaý mınıstrligi rezıdentýraǵa kandıdattardy irikteýdiń sıfrlyq platformasyn engizýge túsinikteme bergen bolatyn.