Merılend ýnıversıtetiniń zertteýshileri gremýchaıa jylandardy óz ýynan qorǵaıtyn aqýyzdar ámbebap ýǵa qarsy dáriniń negizi bola alatynyn anyqtady, dep habarlaıdy infohub.kz.
Bıologıa profesory Shon B. Kerroll bastaǵan ǵalymdar toby ýly jylan shaqqanda emdeýdiń tıimdi ádisin jasap shyqty. Olar bul ádisti jylandardyń óz qorǵanys mehanızminen aldy. Zertteý nátıjeleri Proceedings of the National Academy of Sciences jýrnalynda jarıalandy. Ǵalymdar tehas gremýchaıa jylanynyń qanyndaǵy arnaıy qorǵanys aqýyzdaryn biriktirip, qaýipti toksınderdi beıtaraptandyrýǵa qol jetkizdi.
Dúnıejúzilik densaýlyq saqtaý uıymynyń derekterine sáıkes, ýly jylandar jyl saıyn 80 myńnan 140 myńǵa deıin adamnyń ómirin qıady. Qazirgi sarysýlar iri janýarlarǵa ý engizip, olardyń antıdenelerin jınaý arqyly alynady. Alaıda mundaı preparattar óndiriste qymbat, aýyr alergıalyq reaksıalar týdyrýy múmkin jáne ártúrli jylan túrleriniń ýyna qarsy árdaıym tıimdi bola bermeıdi.
2022 jyly Kerroll toby jylan qanynan FETUA-3 aqýyzyn tapqan bolatyn. Bul aqýyz ýly metaloproteınazalardy bógeıdi. Jańa zertteýde ǵalymdar Tehas A&M ýnıversıtetiniń Kıngsvılldegi tabıǵı toksınderdi zertteý ulttyq ortalyǵynyń dırektory Elda Sanchespen birlesip, FETUA tobyndaǵy aqýyzdardyń ártúrli kombınasıalaryn synady.
Zerthanalyq tájirıbeler kórsetkendeı, ońtaılandyrylǵan aqýyz qospalary qoı qanynan alynatyn qazirgi sarysýdan shamamen 10 ese tıimdi. Bul kombınasıa gremýchaıa jylany ýynyń ólimge ákeletin áserin tolyq beıtaraptandyryp, basqa sur jylandardyń ýynan da qorǵaıdy. Avtorlar zerthanada jasalǵan rekombınantty preparattar qazirgi sarysýlarǵa qaýipsiz jáne qoljetimdi balama bolady dep úmittenedi.