Grýzıadaǵy Kýlev munaı óńdeý zaýyty reseılik shıkizattan bas tartyp, Qazaqstan men Lıvıa munaıyn óńdeýge kóshe bastady. Jetkizýshilerdiń aýysýy Eýropalyq Odaqtyń talaptaryna jáne sanksıalyq rejımdi saqtaý qajettiligine baılanysty, dep habarlaıdy infohub.kz saıty.
Termınaldy basqaratyn Black Sea Petroleum kompanıasynyń málimetinshe, shilde aıynda kásiporyn qazaqstandyq munaıdyń alǵashqy partıasyn qabyldap, óńdegen. Qazaqstannan jetkizý tamyz aıynda da jalǵasady.
Kelesi kezeń – Lıvıa munaıyn jetkizýdi bastaý. Kompanıanyń málimdeýinshe, alǵashqy partıa zaýytqa 20-30 tamyz aralyǵynda túsýi tıis. Lıvıalyq shıkizatty jetkizý týraly kelisimge taraptar 3 shildede qol qoıǵan.
Black Sea Petroleum Eýropalyq komısıamen yntymaqtastyqty jalǵastyryp, jetkizý dıversıfıkasıasy baǵdarlamasynyń iske asý barysy týraly ony únemi habardar etip otyratynyn atap ótti.
Reseı munaıynan bas tartý Eýropalyq Odaqtyń sanksıalaryna baılanysty. Eger Kýlev munaı óńdeý zaýyty balamaly shıkizat kózderine kóshpese, 2027 jyldyń 25 qańtarynan bastap kásiporynǵa EO-nyń 21-shi sanksıalar paketinde qarastyrylǵan shekteýler qoldanylady.
Buǵan deıin Black Sea Petroleum reseı munaıyn óńdeýdi tamyz-qyrkúıek aılarynda toqtatýǵa nıetti ekenin málimdegen bolatyn. Eýropalyq Odaq sanksıalyq sharalardy qoldanbaý úshin kásiporynnan reseılik shıkizatty qabyldaýdan bas tartýdy talap etken.
2025 jyly Qazaqstan álemniń 29 eline 76 mıllıon tonna munaı jetkizgen. Bul týraly «Geostatıstıka» telegram-arnasy habarlaǵan.
2025 jyly qazaqstandyq munaıdyń eń iri ımporttaýshysy Italıa boldy – 1,29 mln tonna, quny 15 mlrd dollar. Alaıda sarapshylardyń aıtýynsha, is júzinde Italıa taratý haby retinde qyzmet etedi, ol jerden munaı qubyrlary arqyly Eýropanyń basqa elderine jiberiledi. Qazaqstandyq munaıdyń naqty eń iri satyp alýshysy – Germanıa.
Eske salaıyq, KTK-ǵa jasalǵan shabýyldar men teńiz termınalynyń jabylýynan keıin Qazaqstanda munaı óndirý táýligine 1,63 mln barelge deıin tómendegen, al shildedegi ortasha óndiris deńgeıi táýligine 2,07 mln bareldi quraǵan.