Orda.kz ınternet-basylymynyń burynǵy bas redaktory Gúlnara Bajkenova segiz jylǵa bas bostandyǵynan aıyrylyp, jazasyn óteý eki jylǵa keıinge shegerildi. Mundaı úkimdi Almaty qalasy Bostandyq aýdanynyń №2 aýdandyq soty shyǵardy, dep habarlaıdy infohub.kz saıty.
Sot Bajkenovany ózine senip tapsyrylǵan múlikti ıemdený nemese ysyrap etý, zańsyz kásipkerlikpen aınalysý jáne ádeıi jalǵan aqparat taratý faktileri boıynsha kináli dep tanydy.
Sot málimetinshe, 2024 jyldyń qarashasynan 2025 jyldyń jeltoqsanyna deıin JSHS basshysy qyzmetin atqara otyryp, ol kompanıanyń shottarynan 88,1 mıllıon teńgeden astam qarajatty jymqyrǵan. Aqsha jarnamalyq, kásibı jáne ǵylymı qyzmetterdiń aqysy retinde baqylaýyndaǵy jeke kásipkerdiń shotyna aýdarylǵan. Sonymen qatar, kompanıa qarajaty esebinen onyń ulynyń jeke halyqaralyq mekteptegi oqý aqysy tólengen.
Taǵy 121,2 mıllıon teńgeni Bajkenova Almatydaǵy páterlerdi satyp-satýdan alǵan. Bul rette ol kásipkerlik sýbektisi retinde tirkelmegen jáne alǵan tabysynan salyq tólemegen.
İste sondaı-aq 2024–2025 jyldary ádeıi jalǵan aqparat taratýdyń segiz epızody bar. Sot habarlamasyna sáıkes, aqparattyq-taldaý portalynyń bas redaktory qyzmetin atqara otyryp, Bajkenova aldyn ala sóz baılasqan adamdar tobynda áreket etken. Aqparat ınternet-resýrstar men áleýmettik jeliler arqyly taratylyp, sottyń baǵalaýynsha, azamattarǵa, uıymdarǵa jáne memleketke eleýli zıan keltirgen.
«Sot úkimimen B. kináli dep tanylyp, BAQ, jýrnalısıka, blogıng, jarıa is-sharalar jáne ózge de qoǵamdyq qyzmet salasynda qyzmet atqarý quqyǵynan 5 jylǵa aıyra otyryp, 8 jylǵa bas bostandyǵynan aıyrý jazasy taǵaıyndaldy. Sondaı-aq oǵan BAQ-qa qatysty uıymdarda basshylyq jáne materıaldyq jaýapty laýazymdardy atqarýǵa tyıym salyndy», — delingen sot habarlamasynda.
Negizgi jazadan basqa, Bajkenovadan 95,9 mıllıon teńge materıaldyq zalal, 2,8 mıllıon teńge memlekettik baj jáne 6,8 mıllıon teńge zańgerlik kómek pen is júrgizý shyǵyndary óndirildi.
Bajkenova taǵaıyndalǵan merzimdi dereý óteı bastamaıdy. Sot QK-niń 74-babynyń 1-bóligin qoldanyp, onyń 14 jasqa tolmaǵan balasy bolýyna baılanysty jazany óteýdi eki jylǵa keıinge shegerdi.
Úkim zańdy kúshine engen joq.
Buǵan deıin «Kýrsıv» 2025 jyldyń jeltoqsanynda tergeý soty ORDA bas redaktory Gúlnara Bajkenovaǵa qatysty eki aılyq úı qamaýyn sanksıalaǵanyn jazǵan bolatyn. Sol kúni basylym redaksıasynda jáne jýrnalısiń páterinde tintý júrgizilgen. Almaty polısıasy ádeıi jalǵan aqparat taratý faktileri boıynsha birneshe qylmystyq is qozǵalǵanyn habarlaǵan.