Amerıkalyq aktrısa Haıden Panetterdiń óliminiń resmı sebebi anyqtaldy: «Geroı» men «Neshvıll» serıaldarynyń 36 jastaǵy juldyzy fentanıl men birqatar basqa preparatty kezdeısoq artyq mólsherde qabyldaýdan kóz jumdy. Bul týraly sarapshylar málimdedi, dep habarlaıdy Variety, infohub.kz saıtyna silteme jasap.
Ońtústik Karolına shtatyndaǵy Grınvıll okrýginiń koroner keńsesi aktrısanyń ólimine qatysty toksıkologıalyq saraptama nátıjelerin jarıalady. Medısınalyq sarapshylardyń resmı málimdemesine sáıkes, ártis fentanıl, alprazolam, metokarbamol, kvetıapın jáne 4-ANPP zatynyń ýly áserinen qaza tapqan.
Panetterdiń ólimi jazataıym oqıǵa dep tanyldy. Onyń denesinen jaraqat nemese zorlyq-zombylyq izderi tabylmaǵan. Jergilikti polısıa ókilderi de oqıǵa ornyn alǵashqy tekserý kezinde kúdikti mán-jaı nemese qylmys belgisi anyqtalmaǵanyn rastady.
Aktrısa 2026 jylǵy 16 tamyzda Grınvıll qalasyndaǵy páterinde qaıtys boldy. Shaqyrtý boıynsha kelgen dárigerler 40 mınýttan astam reanımasıalyq sharalar júrgizdi, alaıda Panetterdiń ómirin saqtap qalý múmkin bolmady, ol oqıǵa ornynda óli dep jarıalandy. Oqıǵa kezinde páterde onyń jigiti Braıan Hıkerson aǵasymen birge bolǵan, olar jedel qyzmetterdi shaqyrǵan.
Haıden Panetter akterlik mansabyn bala kezinen bastap, jarnamalyq rolıkter men teleshoýlarǵa túsken. Oǵan álemge áıgililikti «Geroı» fantasıkalyq serıalyndaǵy Kler Bennet róli, sondaı-aq «Neshvıll» dramasyna qatysýy ákeldi. Sońǵy jyldary ártis psıhıkalyq máselelermen jáne táýeldilikpen kúresi týraly ashyq aıtyp júrdi. Quqyq qorǵaý organdary bolǵan oqıǵanyń barlyq egjeı-tegjeıin tergeýdi jalǵastyrýda.