Ǵalymdar Japonıanyń Hırosıma qalasynan alynǵan topyraq úlgilerinen ǵylymǵa buryn belgisiz zatty tapty. Ol «hırosımaıt» dep ataldy. Zertteýshilerdiń paıymdaýynsha, bul zat 1945 jylǵy atom bombasy jarylysynan keıin paıda bolǵan. Bul týraly «Kýrsıv» basylymy habarlaıdy (tolyǵyraq — infohub.kz saıtynda).
Bul jańalyqty Florensıa ýnıversıtetiniń ıtalıalyq geology ári krıstalografy Lýka Bındı ashty. Hırosımaıt – dıametri shamamen 10 mıkrometr bolatyn mıkroskopıalyq sferalar. Olar temir, nıkel, kremnı jáne alúmını sıaqty bes nemese odan da kóp metal elementterinen turady ári biryńǵaı krıstaldyq qurylymǵa birikken. Mundaı kóp komponentti quımalar tabıǵatta óte sırek kezdesedi.
Ǵalymdardyń aıtýynsha, zat 1945 jylǵy 6 tamyzda atom bombasy jarylǵannan keıin epısentrdegi temperatýra 7 myń gradýstan asqan kezde paıda boldy. Qurylys materıaldary, topyraq jáne metal konstrýksıalar býlanyp, sosyn salqyndaý kezinde óte usaq tamshylarǵa aınalyp, olar krıstaldyq sfera túrinde qatty.
Zertteý avtorlarynyń pikirinshe, mundaı materıaldar joǵary beriktikke, korozıaǵa jáne ekstremaldy temperatýraǵa tózimdi bolýy múmkin. Sonymen qatar, bul jańalyq ıadrolyq jarylystardyń tek qana materıaldardy joıyp qana qoımaı, jańa kúrdeli krıstaldyq qurylymdardy da jasaı alatynyn kórsetedi.
Buǵan deıin «Kýrsıv» basylymy ǵalymdardyń jasandy ıntellekt kómegimen antıbıotıkterdiń jańa klasyn ashqanyn habarlaǵan bolatyn.