Qazaqstandyq komersıalyq tehnıka óndirýshisi Hyundai Trans Auto Belarýske 2027–2028 jyldary 790 kólik jetkizý týraly kelisimge qol qoıdy. Kelisimshart somasy keminde 30 mln dollardy quraıdy. Qujat «Innoprom. Belarýs» forýmy aıasynda belarýstik «Er Sı Em» JSHQ-men jasaldy, dep habarlaıdy infohub.kz saıty.
Qazaqstannyń Saýda jáne ıntegrasıa mınıstrliginiń baǵalaýynsha, otandyq avtokólik óndirýshileriniń belarýs naryǵyndaǵy eksporttyq áleýeti jylyna 4,5 myń kólikke jetedi.
Qazaqstandyq kompanıalar osy baǵyttaǵy jetkizilimdi ulǵaıtýdy jalǵastyryp keledi. 2026 jyldyń qańtarynda Mınskide «Kazah Treıd Haýs» Qazaqstannyń saýda úıi jumysyn bastady. Onyń mindeti — otandyq ónimdi ilgeriletý jáne eksporttyq jobalardy súıemeldeý. Jetkizýshiler qataryna jyl saıyn Belarýske 300 myń dollarǵa deıingi somaǵa 20 júk kóligin jiberýdi josparlaǵan segiz qazaqstandyq óndirýshi endi.
Sonymen qatar taraptar avtomobıl ónerkásibindegi birlesken jobalardy talqylap jatyr. Atap aıtqanda, «POJSNAB» JSHQ men «Avtokomponenty KZ» JSHS arnaıy órt sóndirý tehnıkasyn óndirýdi uıymdastyrýdy pysyqtaýda.
Qazaqstan men Belarýs arasyndaǵy taýar aınalymy 2025 jyldyń qorytyndysy boıynsha 30%-ǵa ósip, 1,2 mlrd dollardan asty. 2026 jyldyń qańtar–shildesinde ózara saýda taǵy 20,5%-ǵa artyp, 723 mln dollarǵa jetti. Bul rette Qazaqstannyń eksporty 180,3 mln dollardy, al ımporty 542,7 mln dollardy qurady.
Bılik jańa ónerkásiptik jáne saýda bastamalary qazaqstandyq ónimniń Belarýske jetkizilimin ulǵaıtýǵa múmkindik beredi dep kútip otyr.
Buǵan deıin Kýrsıv Avto 2026 jyldyń qańtar–tamyzynda qazaqstandyq kásiporyndar 126,4 myń avtomobıl jáne basqa da tehnıka shyǵarǵanyn habarlaǵan. Hyundai Trans Almaty 837 komersıalyq jáne arnaıy kólik, al Hyundai Trans Kazakhstan 25,1 myń jeńil avtomobıl óndirdi.