Qazaqstanda jańa Hyundai Tucson óndirisi jolǵa qoıylady. Tıisti kelisimge Hyundai Motor Company men Astana Motors kompanıalary Qazaqstan prezıdenti Qasym-Jomart Toqaevtyń HMG strategıa jáne josparlaý bólimshesiniń basshysy Sýng Kımmen kezdesýi qorytyndysynda qol qoıdy, dep habarlaıdy infohub.kz saıty.
İske qosylatyn naqty merzimi men kólemi ázirge naqtylanǵan joq.
Kezdesý barysynda taraptar Qazaqstandaǵy ınvestısıany keńeıtý, óndiristik qýatty arttyrý jáne jergilikti óndiristi tereńdetý máselelerin talqylady. Prezıdent Toqaev avtokomponent shyǵarylymyn ulǵaıtyp, avtomobıl salasynyń eksporttyq áleýetin arttyrý qajettigin atap ótti.
Qazir Hyundai kólikterdi Almatydaǵy Hyundai Trans Kazakhstan zaýytynda shyǵarady. Memleket basshysy Qostanaıdaǵy Kia kásipornynyń rólin de atap ótip, Qazaqstandy tolyq sıkldi damyta otyryp, avtomobıl óndirý men eksporttaýdyń óńirlik ortalyǵyna aınaldyrý mindetin qoıdy.
Hyundai óz tarapynan qatysýyn keńeıtip, jergilikti óndiristi tereńdetý nıetin rastady. Yntymaqtastyqtyń jeke baǵyty retinde elektr kóligi — elektromobılder men olardyń komponentterin óndirý, sondaı-aq qýattandyrý ınfraqurylymyn damytý ataldy.
Jańa «Týssannyń» syrtqy kelbeti aıtarlyqtaı ózgerip, aldyńǵy býynmen salystyrǵanda úlkeıgen. Krosoverdiń uzyndyǵy 4700 mm-ge, dóńgelek bazasy 2785 mm-ge jetti, eni 1905 mm, bıiktigi 1685 mm boldy. İshki kórinisi de qaıta jasaldy. Salonda fızıkalyq basqarý elementteri saqtalyp, olar úlken ortalyq ekranmen jáne sıfrlyq aspaptar taqtasymen tolyqtyryldy.
Buǵan deıin Kýrsıv Avto Qazaqstanda eń kóp satylatyn markalar arasynda Hyundai kósh bastap turǵanyn, al Tucson tanymal modelder arasynda ekinshi orynǵa shyqqanyn habarlaǵan edi.