Qazaqstanda avtoshkolalardyń jumys sapasy áli de kúrdeli másele bolyp otyr: oqý oryndarynyń kóbinde qajetti materıaldyq-tehnıkalyq baza joq, al oqytýshylar men nusqaýshylardyń biliktiligi belgilengen talaptarǵa saı emes. Bul týraly úkimette ótken brıfıńte İshki ister mınıstriniń orynbasary Igor Lepeha málimdedi, dep habarlaıdy infohub.kz saıty.
İİM basshysynyń orynbasary aıtýynsha, avtoshkolalardy baqylaýdaǵy mańyzdy qadam — Qazaqstanda júrgizýshilerdi óz betinshe daıarlaýǵa tyıym salynýy boldy. Sonymen qatar kýrsty bitirgeni týraly qaǵaz kýálikterge de tyıym salyndy — bul shara qujattardy burmalaýdyń aldyn alýǵa baǵyttalǵan.
«Qazir avtomattandyrylǵan júıe jumys isteıdi: adam avtoshkolaǵa túsken boıda esepke qoıylady. Sondyqtan avtoshkola tyńdaýshysy bolyp keıinnen tirkelý múmkin emes. Bul sharalar nátıje berdi. Ótken jyly kólik júrgizý ótili bir jylǵa deıingi júrgizýshilerdiń kinásinen bolǵan JKO sany 40%-ǵa azaıdy, bıyl taǵy 7%-ǵa tómendedi», — dedi vıse-mınıstr.
Ol bolashaqta avtoshkolalardy ashý kezeńinen bastap tártipti baqylaý josparlanyp otyrǵanyn qosty.
«Ókinishke qaraı, búginde beınelep aıtqanda, tek bólmesi, oryndyǵy jáne móri ǵana bar kóptegen avtoshkola jumys istep jatyr. Olarda qajetti materıaldyq-tehnıkalyq baza joq, al oqytýshylar men nusqaýshylardyń biliktiligi talaptarǵa saı emes. Sondyqtan avtoshkola ashar aldynda oqytýshylardyń biliktiligin, qajetti oqý bazasynyń jáne kólikterdiń bar-joǵyn tekseretin bolamyz», — dedi İİM basshysynyń orynbasary.
Eske salaıyq, bıyl kóktemde Qazaqstandaǵy avtoshkolalarda tártip buzýshylyqtarǵa baılanysty 700-den astam oqý tobynyń daıarlyǵy toqtatylǵan bolatyn.