İshki ister mınıstri Erjan Sadenov ishki ister organdary qyzmetkerlerine arnalǵan jetonnyń jańa úlgisin, sondaı-aq ony berý, saqtaý jáne qaıtarý tártibin bekitetin buıryqqa qol qoıdy. Qujat normatıvtik quqyqtyq aktilerdiń etalondyq baqylaý bankiniń saıtynda jarıalanǵan, dep habarlaıdy infohub.kz.
Buıryqqa sáıkes, basshylyq quramdaǵy árbir qyzmetkerge bir árip pen alty sıfrdan turatyn jeke nómir beriledi. Bul nómir qyzmetkerge qyzmet etý jáne zapasqa shyqqanǵa deıingi barlyq kezeńde bekitiledi. Nómir alǵashqy arnaıy ataq berilgen kezde tabystalatyn metal jetonǵa oıylyp jazylady.
Jeke nómir qyzmettik qujattarda — kýálikte, kadrlyq qujattarda, buıryqtarda, aqshalaı jáne zattaı qamtamasyz etý qujattarynda, sondaı-aq qyzmettik hat-habarlarda qoldanylady. Qyzmetker basqa laýazymǵa aýysqan kezde, eger oǵan buryn qyzmet nemese esepke alý orny boıynsha jeke nómir berilgen bolsa, ol saqtalady.
Zapasqa nemese otstavkaǵa shyqqan kezde jeton kadr qyzmetine tapsyrylýy tıis, onda ol jeke ispen birge saqtalady.
Sıpattamada jetonnyń qalyńdyǵy 1,5–2 mm bolatyn sopaq pishindi metal plasınka túrinde jasalatyny kórsetilgen. Úlken osi boıynsha ólshemi — 45 mm, kishi osi boıynsha — 26 mm. Aldyńǵy betinde boılyq ós boıymen shtamptalǵan jolaq bar. Jolaqtyń ústinde «VS RK» degen jazý, al astynda — serıa (orys álipbıindegi árip) jáne jetonnyń nómiri ornalasqan. Osy jazýlardyń sol jaǵynda jetondy kıimge nemese jeke iske bekitýge arnalǵan dıametri 4 mm tesik qarastyrylǵan.