Qazaqstan İshki ister mınıstrligi áleýmettik jelilerdegi quqyqqa qaıshy kontentke qarsy kúresti kúsheıtti. Vedomstvonyń málimetinshe, elimizdiń túkpir-túkpirinde tikeleı efır kezinde qoǵamdyq tártipti buzǵan 20-dan astam strımer ákimshilik jaýapkershilikke tartylǵan, dep habarlaıdy infohub.kz saıty.
Júrgizilgen monıtorıń kórsetkendeı, translásıa avtorlary kontentti monetızasıalaýǵa jáne aýdıtorıany ulǵaıtýǵa umtylyp, zańnamany júıeli túrde elemegen. Negizgi buzýshylyqtar qatarynda — balaǵat sózder, ádepsiz jáne agressıvti minez-qulyqty kórsetý, qaýipti prankter uıymdastyrý, sondaı-aq azamattardy kópshilik aldynda qorlaý. İİM-de mundaı materıaldar eleýli qaýip tóndiretinin, óıtkeni kámeletke tolmaǵandar olarǵa kún saıyn erkin qol jetkize alatynyn atap ótti.
Búgingi tańda sottar elimizdiń ártúrli aımaqtarynda naqty buzýshylarǵa qatysty sheshimder shyǵardy. Máselen, Pavlodarda 26 jastaǵy Aslan Amantaev kólik júrgizý kezinde qaýipsizdik beldigin taqpaı, balaǵat sózder aıtyp translásıa jasaǵany úshin 20 táýlikke qamaýǵa alyndy. Shymkentte 48 jastaǵy Erbol Dýısenbaev TikTok-ta tikeleı efırde balaǵat sózder qoldanǵany úshin on táýlikke qamaldy. Taldyqorǵanda 44 jastaǵy Gúlmıra Kasenova qoǵamdyq tártipti qaıta buzǵany jáne TikTok-ta balaǵat sózder aıtqany úshin aıyppul tóledi. Túrkistanda Baıan Shankeeva tikeleı efırlerdegi agressıvti minez-qulqy men balaǵat sózderi úshin ákimshilik aıyppulǵa tartyldy.
Quqyq qorǵaý organdary sıfrlyq keńistikti quqyqqa qaıshy materıaldardan tazartý jáne monıtorıń boıynsha júıeli jumysty jalǵastyrýdy josparlap otyr. İshki ister mınıstrligi zańnama normalary men «Zań jáne Tártip» qaǵıdaty naqty ómirde de, ınternet-keńistikte de birdeı mindetti ekenin eske saldy.
Buǵan deıin 2024 jyly Qaznette anyqtalǵan quqyqqa qaıshy kontent kólemi eki ese óskeni habarlanǵan bolatyn.