Instagram әлеуметтік желісі ұзақтығы 90 минутқа дейінгі көлденең бейнелерді сынақтан өткізе бастады. Компания осылайша өз теледидар қосымшаларына көрермен тартуды көздеп отыр, деп хабарлайды infohub.kz сайты.
«Features» (функциялар) деп аталған жаңа формат әзірге Meta-мен келісім жасасқан шектеулі авторларға ғана қолжетімді. Компания ең алдымен әзілкештер мен подкаст авторларын тартып отыр. Көлденең бейнелерді кәдімгі мобильді қосымшадан көруге болады, алайда әзірлеушілер ұзақ шығарылымдарды қолданушылар үлкен экрандардан тамашалайды деп сенеді.
Instagram басшысы Адам Моссери басшылықтың әдеттегі қысқа бейнелерге деген қызығушылықтың төмендеуінен қауіптенгенін мойындады. Соған қарамастан компания форматтардың бір-бірін қолдайтынына үміттенеді: көрермен смартфондағы Reels-тен қысқа үзінді көріп, кейін шығарылымның толық нұсқасын теледидардан аша алады.
Осы мақсатта сервис теледидар қосымшаларының қатарын кеңейтіп келеді: Fire TV нұсқасынан кейін Apple TV-ге арналған қосымша, сондай-ақ Samsung мен Google TV құрылғыларын қолдау пайда болды. Енді теледидар экрандарынан стористерді, тікелей эфирлерді және өзара байланысты қысқа бейнелер серияларын көруге болады.
Бұл жаңалық Meta-ның ұзақ контент пен ірі жарнама келісімдері үшін YouTube-пен бәсекелесу жолындағы кезекті әрекеті болды. Компанияның бұған дейінгі ұқсас жобасы — 2018 жылы іске қосылған IGTV сервисі — жеткілікті танымалдыққа ие болмай, 2022 жылы жабылды. Моссеридің айтуынша, жаңа бағытты дамыту уақытты талап етеді, бірақ компания ұзақ мерзімді жұмысқа бекінген.