«QazaqGaz» UK» AQ enshiles kompanıasy «Intergaz Sentralnaıa Azıa» AQ-da jumysshy kásipteriniń jyl saıynǵy «Úzdik maman-2026» kásibı sheberlik baıqaýy ótti. Bıyl gaz tasymaldaý salasynyń negizgi jumysshy kásipteriniń úzdik mamandary ataǵy úshin 98 qyzmetker baq synady, dep habarlaıdy infohub.kz saıty.
Baıqaýǵa qatysý aldynda mamandar ózderiniń óńirlik óndiristik fılıaldarynda irikteý synaqtarynan ótti. Eki kún boıy qatysýshylar teorıalyq jáne praktıkalyq tapsyrmalardy oryndap, kásibı bilimderin, óndiristik operasıalardy qaýipsiz oryndaý daǵdylaryn, óz betinshe sheshim qabyldaý jáne tótenshe jaǵdaılarda áreket etý qabiletterin kórsetti. Jeke blok jedel dárigerge deıingi kómek kórsetýdiń praktıkalyq daǵdylaryna arnaldy.
Baıqaý komısıasy qatysýshylardy birneshe krıterı boıynsha baǵalady. Olardyń qatarynda teorıalyq daıyndyq deńgeıi, óndiristik tapsyrmalardy oryndaý sapasy, utymdy jáne qaýipsiz eńbek tásilderin qoldaný, kásibı derbestik dárejesi jáne tapsyrmalardy oryndaýǵa jumsalǵan ýaqyt bar.
Baıqaý sonymen qatar túrli óńirlik fılıaldardyń qyzmetkerleri arasynda óndiristik tájirıbe almasý alańyna aınaldy. Ony ótkizý mamandardyń kásibı deńgeıin arttyrýǵa, qaýipsizdik mádenıetin nyǵaıtýǵa jáne tıimdi ári utymdy jumys ádisterin taratýǵa baǵyttalǵan.
İs-shara baǵdarlamasyna qosymsha quzyretterdi oqytý da engizildi. Qatysýshylar úshin jasandy ıntellekt tehnologıalaryn qoldaný boıynsha bilim berý sesıasy uıymdastyryldy. Mamandar zamanaýı sıfrlyq quraldarmen jáne olardy praktıkalyq paıdalaný múmkindikterimen tanysty.
Baıqaý qorytyndysy boıynsha jeńimpazdar joǵary kásibı sheberligi úshin dıplomdarmen jáne aqshalaı syılyqtarmen marapattaldy. Komandalyq esepte úzdik nátıje kórsetken «ÝMG» Aqtaý» fılıalyna baıqaýdyń bas júldesi — «Úzdik maman» ótpeli kýbogy tabys etildi.
«Úzdik maman-2026» baıqaýy «Intergaz Sentralnaıa Azıa» AQ qyzmetkerleriniń kásibı daıyndyq deńgeıin kórsetip, quzyretterdi damytý, óndiristik tájirıbe almasý, zamanaýı tehnologıalardy engizý jáne qaýipsizdik mádenıetin nyǵaıtý alańyna aınaldy.