Tegeran deldaldar arqyly Vashıngtonǵa jeti qatań talaptyń tizimin joldady. Olar oryndalǵan jaǵdaıda ǵana Ormýz buǵazynda keme qatynasy qaıta jandanady. Bul týraly Tasnim agenttigi habarlady, dep jazady infohub.kz.
Basylym dereginshe, AQSh buǵazdy ashýdy talap etip otyrsa da, ońtústik baǵyt áli kúnge deıin jabyq tur. Sonymen qatar Iran men Oman buǵazdaǵy jańa baǵyttardyń egjeı-tegjeıin kelisip alǵany belgili boldy.
Qoıylǵan talaptardyń negizi buryn Iran Qaýipsizdik keńesi tujyrymdaǵan qaǵıdattar boldy. Tegerannyń negizgi sharttary mynadaı:
AQSh pen onyń odaqtastary tarapynan áskerı qaýip-qaterdiń toqtatylýy.
Aımaqtaǵy soǵys pen kez kelgen agresıa áreketteriniń toqtatylýy.
Iran porttaryna salynǵan teńiz blokadasynyń tolyq alynýy.
Iranǵa qarsy engizilgen sanksıalardyń tolyq joıylýy.
Shetelde buǵattalǵan Iran aktıvteriniń barlyǵynyń qaıtarylýy.
El ekonomıkasy men ınfraqurylymyna keltirilgen zıannyń ótelýi.
AQSh shabýyldarynyń toqtatylýy jáne Tegeran múddesi eskerilgen keme qatynasy qaýipsizdiginiń kepildigi.
Iran ókilderi Omanmen birlesken baǵyt pen ýaqytsha dáliz qurý týraly kelisimniń tek ishinara sheshim ekenin, ol buǵazdyń avtomatty túrde ashylatynyn bildirmeıtinin aıryqsha atap ótti. Endi keme qatynasynyń tolyq qalpyna kelýi Vashıngtonnyń jeńildikke barýǵa jáne Iran talaptaryn oryndaýǵa daıyndyǵyna tikeleı baılanysty.
Aıta keteıik, 6 qyrkúıekte Islam Respýblıkasy Joǵary ulttyq qaýipsizdik keńesiniń hatshysy Mohsen Rezaı Ormýz buǵazy keme qatynasy úshin tolyq jabylǵanyn málimdegen edi.
Buǵan deıin «Kýrsıv» AQSh Prezıdenti Donald Tramptyń Iranmen soǵys qashan aıaqtalatynyn aıtqanyn jazǵan bolatyn.