Alaıaqtar qazaqstandyqtarǵa jıi qońyraý shalyp, ózderin komýnaldyq qyzmetkerler retinde tanystyrady. Jylý eseptegishin tirkeý, qujattardy jańartý, jeńildikter rásimdeý nemese bereshekti tekserý syltaýymen bank shottary men jeke derekterine qol jetkizýge tyrysady, dep habarlaıdy infohub.kz.
İİM málimetinshe, sóılesý barysynda alaıaqtar adamdy telefonǵa kelgen SMS kodyn aıtýǵa kóndiredi. Dál osy kod alaıaqtarǵa banktik qosymshalarǵa, memlekettik servısterdegi akkaýnttarǵa jáne basqa da jeke derekterge kirýge múmkindik beredi.
«SMS kodynyń kómegimen alaıaqtar banktik qosymshaǵa kirýge; memlekettik servısterdegi akkaýnttarǵa qol jetkizýge; sizdiń atyńyzdan zańsyz áreketter jasaýǵa tyrysýy múmkin», – dep eskertti İİM.
Polısıa naqtylaıdy: naǵyz komýnaldyq qyzmetkerler eshqashan telefon arqyly SMS kodtaryn, bank kartasynyń derektemelerin nemese basqa qupıa aqparatty suramaıdy.
«Eger sizge osyndaı qońyraý kelse, áńgimeni birden toqtatqan durys. Kúmán týyndaǵan jaǵdaıda resmı nómir boıynsha uıymnyń ózine habarlasý kerek. Sondaı-aq beıtanys adamdardyń nusqaýy boıynsha siltemelerge ótý nemese qosymshalardy ornatý qajet emes», – dep atap ótti polısıa.
Quqyq qorǵaý organdary jańa sqema týraly týystarǵa, ásirese telefon alaıaqtarynyń qurbanyna jıi aınalatyn egde jastaǵy adamdarǵa eskertýge keńes beredi.
Polısıa eske salady: bir ǵana aıtylǵan SMS kody qylmyskerlerdiń sizdiń shottaryńyzǵa qol jetkizip, aqshany urlaýyna jetkilikti bolýy múmkin.
Jyl basynan beri polıseıler aldanǵan qazaqstandyqtarǵa 4,8 mlrd teńgeni qaıtarýǵa qol jetkizdi.
Buǵan deıin «Kýrsıv» krıptoındýstrıadaǵy alaıaqtardyń honeypot («bal qumyrasy») sqemasyn qoldanatynyn, bul ınvestorlarǵa tokendi esh qıyndyqsyz satyp alýǵa múmkindik beretinin, biraq ony satýdy múmkin etpeıtinin jazǵan bolatyn.