Japonıa Reseı prezıdenti Vladımır Pýtınniń daýly araldarǵa saparyna «qatty narazylyq» bildiretinin málimdedi. Reseı memlekettik BAQ-tyń beısenbidegi habarlaýynsha, Pýtın Itýrýp aralyna barǵan. Bul araldy Japonıa Etorofý dep ataıdy jáne ol Reseı men Japonıa daýlasyp júrgen Kýrıl tizbegindegi tórt araldyń biri.
Japonıanyń syrtqy ister mınıstri Tosımısý Motegı araldar «tarıhı turǵydan da, halyqaralyq quqyq turǵysynan da Japonıanyń ajyramas aýmaǵy ekenin, sondyqtan Japonıa úkimeti bul saparǵa qatty narazylyq bildiretinin» aıtty. Eki el ondaǵan jyldar boıy Kýrıl araldaryna qatysty daýlasyp keledi. Dál osy daý Máskeý men Tokıonyń Ekinshi dúnıejúzilik soǵystan keıin bitimgershilik kelisimge qol qoıýyna kedergi boldy.
Kýrıl araldary Japonıanyń soltústigindegi Hokkaıdo men Reseıdiń Kamchatka túbeginiń arasynda ornalasqan. Eń ońtústiktegi tórt araldy Japonıa óz aýmaǵy dep sanaıdy jáne olardy «Soltústik aýmaqtar» dep ataıdy. Bul araldardy Reseı basqarady. Ekinshi dúnıejúzilik soǵystyń sońynda Keńes Odaǵy araldardy ózine qosyp alyp, 17 myńǵa jýyq japon turǵynyn kóshirip jiberdi.
Reseı memlekettik BAQ-tyń habarlaýynsha, beısenbidegi sapary kezinde Pýtın balyq ýyldyryǵynan dám tatyp, aral turǵyndarymen sóılesken. Araldar Reseıdiń áskerı operasıalary úshin strategıalyq mańyzǵa ıe, Itýrýp aımaqtaǵy negizgi áskerı áýe bazasy retinde paıdalanylady. Ótken aıda Qytaı men Reseıdiń áskerı kemeleri birlesken patrúldeý kezinde Kýrıl araldaryndaǵy buǵaz arqyly ótken edi. Sondaı-aq, Reseı ótken jyly araldar mańynda áskerı oqý-jattyǵýlar ótkizip, Japonıanyń aıyptaýyna ushyraǵan.