Qazaqstan quramasynyń fýtboldan jańa bas jattyqtyrýshysy Djon van ’t Shkıp ulttyq komandaǵa oıynshylardy irikteý krıterıleri men Ulttar lıgasynyń aldaǵy oıyndaryna qoıylǵan mindetter týraly aıtyp berdi, dep habarlaıdy infohub.kz saıty.
Bapkerdiń aıtýynsha, eń aldymen fýtbolshy quramada óner kórsetý úshin qajetti qasıetterge ıe bolýy kerek. «Qurama sapynda kóptegen mach ótkizgen oıynshylar bar, biz olardy muqıat baqylaýdy jalǵastyramyz. Sonymen qatar, ózin kórsete alatyn jáne ulttyq komandaǵa iligý múmkindigine ıe bola alatyn basqa fýtbolshylardyń bar-joǵyn kórgimiz keledi. Quramanyń esigi barlyǵyna ashyq, kez kelgen oıynshy óz oıynymen laıyq bolsa, múmkindik ala alady», — dedi maman.
Taǵy bir mańyzdy krıterı retinde ol fızıkalyq daıyndyqty atady. «Bizge óte qysqa ýaqyt ishinde tórt mach ótkizý kerek, sondyqtan oıynshylar alańda tolyq 90 mınýt óner kórsetýge nemese machtyń belgili bir bóligin sapaly oınaýǵa daıyn bolýy tıis. Sondaı-aq quram teńgerimi mańyzdy. Biz ár pozısıaǵa eki fýtbolshydan bolǵanyn qalaımyz», — dep atap ótti van ’t Shkıp.
Komandanyń basty mindeti retinde ol Ulttar lıgasynda sátti óner kórsetýdi atady. «Biz sapaly fýtbol kórsetip, upaı jınap, múmkindiginshe joǵary orynǵa jetýdi qalaımyz. Árıne, biz árqashan maksımaldy nátıjege umtylýymyz kerek, al bul — birinshi oryn. Dál osy maqsatty aldymyzǵa qoıýymyz kerek. Oǵan jete alatynymyzdy machtar kórsetedi, biraq biz komandamyzdyń qasıetine jáne osy maqsat úshin kúrese alatynymyzǵa senemiz», — dep túıindedi bapker.
Eske salaıyq, 7 tamyzda Qazaqstan fýtbol federasıasy golandıalyq maman Djon van ’t Shkıpti quramanyń bas jattyqtyrýshysy qyzmetine taǵaıyndaý týraly habarlaǵan bolatyn. Bapkerlik shtabqa sondaı-aq Nurbol Jumasqalıev (asıstent), Eldos Ahmetov (asıstent), Iýrı Novıkov (qaqpashylar bapkeri), Vadım Borovskı (dene shynyqtyrý bapkeri) jáne Tımýr Qusaıynov (analıtık) kirdi.