Qazaqstan Premer-mınıstri Oljas Bektenov Kólik mınıstrliginiń jaǵdaı ortalyǵyna baryp, memleket basshysynyń tapsyrmalarynyń oryndalýymen tanysty, dep habarlaıdy infohub.kz saıty.
Qazirgi ýaqytta vedomstvo avtomobıl, temirjol jáne avıasıa salalaryna ınovasıalyq sıfrlyq sheshimderdi belsendi túrde engizýde. e-Joldar, Smart Cargo, Q-Gate, QazETA, Echelon Alpha jáne basqa da platformalar quryldy.
«Prezıdent Qasym-Jomart Toqaev sıfrlyq qyzmetter memleketin odan ári qurýdyń basymdyǵyn belgiledi. Sıfrlandyrý men jasandy ıntellekt azamattarǵa, bızneske jáne memleketke naqty paıda ákelýi tıis. Úkimet aldynda ekonomıkanyń barlyq salasyna paıdaly JI sheshimderin engizý qarqynyn jedeldetý mindeti tur. Búgin usynylǵan kólik salasyn tehnologıalyq transformasıalaý jobalaryn elimizdiń barlyq aımaǵynda qysqa merzimde tolyq engizýdi tapsyramyn», – dedi QR Premer-mınıstri Oljas Bektenov.
Qazaqstan jol ǵylymı-zertteý ınstıtýty (QazjolǴZI) da salany sıfrlandyrýǵa belsendi qatysýda. Kezdesý barysynda ınstıtýt ınovasıalyq jyljymaly zerthanany tanystyrdy. Mobıldi keshenderdi iske qosý jobasy byltyr júzege asyrylyp, el úshin biregeı boldy.
«Jol jelisin zertteý úshin ınstıtýt 3 arnaıy jyljymaly jol zerthanasyn paıdalanady, olar qozǵalys barysynda avtomobıl joldarynyń jaı-kúıi týraly sıfrlyq derekterdi jınaýǵa jáne taldaýǵa múmkindik beredi. Zerthanalar beınekameralarmen, ólsheýish dachıktermen, GPS/GLONASS júıelerimen, jol tóseminiń aqaýlaryn anyqtaýdyń avtomattandyrylǵan júıesimen jáne borttyq esepteý keshenderimen jabdyqtalǵan. Tekserý barysynda jol tóseminiń, belgiler men razmetkanyń, qorshaýlar men jol jıekteriniń jaı-kúıi, joldyń geometrıalyq parametrleri jáne qozǵalys qaýipsizdigine áser etetin basqa da faktorlar tirkeledi», – dedi «QazjolǴZI» AQ vıse-prezıdenti Kenjebek Azatbekov.
Qazirdiń ózinde ınstıtýt otandyq óńirlerge jol tóseminiń sapaly sıfrlyq aýdıtin usynady. Qaýipti ýchaskelerdi anyqtaý jáne basym sharalardy belgileý jumystary Batys Qazaqstan, Mańǵystaý oblystarynda jáne Almaty qalasynda júrgizilýde. Aýdıtten keıin mamandar negizdelgen usynystar jasaıdy, bul aqaýlardy jeke-jeke joıýdan jol jelisin júıeli túrde jańartýǵa kóshýge múmkindik beredi.
QazjolǴZI jol qozǵalysy qaýipsizdiginiń aýdıtine de kóńil bóledi. Instıtýt qyzmetkerleri Chehıada oqýdan ótip, alǵan daǵdylaryn Qazaqstanda qoldanýda. Kólik vıse-mınıstri Dámir Qojahmetov ınstıtýttyń jahandyq maqsattarǵa jetýdegi mańyzdy rólin atap ótti.
«QazjolǴZI – bul bizdiń ǵylymı bazamyz, onda barlyq zerthanalyq zertteýler júrgiziledi. Instıtýt jol tósemine qatysty jańa tehnologıalarǵa jaýapty – sizder bilesizder, qazir betondy jáne polımerbetondy jabyndy qoldaný kózdelgen. Barlyq tıisti zerthanalyq zertteýlerdi dál QazjolǴZI júrgizedi. Bul úles baǵa jetpes, óıtkeni ǵylymsyz odan ári damý múmkin emes», – dep atap ótti QR kólik vıse-mınıstri.