Ye (Kane Ýest) konsertiniń uıymdastyrýshylary kórermenderdi alańǵa kirgizbeıtin tehnıka tizimin jarıalady. Shekteýler ártis talaby boıynsha engizildi, dep habarlaıdy infohub.kz saıty.
First Media Group kompanıasy tyıymnyń kásibı ǵana emes, áýesqoı foto jáne beıne túsirý jabdyqtaryna da qatysty ekenin naqtylady. Máselen, konsertke fotoaparattar (Canon, Nikon, Sony, Fujifilm jáne t.b.), kásibı beınekameralar, DJI Osmo Pocket jáne Osmo Action qalta kameralary, GoPro ekshn-kameralary jáne olardyń analogtary, stabılızatorlar (gımbaldar), aýystyrylatyn obektıvter, shtatıvter, monopodtar men selfı-taıaqshalar, drondar, sondaı-aq kásibı mıkrofondar men dybys jazý qurylǵylaryn alyp kirýge bolmaıdy.
Canon G7X nemese DJI Osmo Pocket-ke túsirýge daǵdylanǵan ınflúenserler men estetıkalyq kadrlardy unatatyndarǵa sol keshte telefonmen shektelýge týra keledi — bul qurylǵylar tyıym salynǵandar tizimine endi. Al paýerbankter erejede atalmaǵandyqtan, zarád týraly alańdamaýǵa bolady.
Ózińizben birge sýsyn men tamaq almaǵanyńyz jón. Ótken jyly Djennıfer Lopestiń konsertinde olardy trıbýnaǵa alyp kirýge qatań tyıym salynǵan bolatyn, kórermender úshin resmı fýd-kort jumys istedi.
Buǵan deıin kompanıa konsert aldynda bıletterge jeńildikter nemese aksıalar bolmaıtynyn málimdegen edi. FMG-de habarlaǵandaı, Almatyǵa 100 tonnadan astam tehnıkalyq jabdyq ákelinýde, al shoý Ye álemdik týrynyń basqa konsertterindegideı keremet bolady.
Eske sala keteıik, Ýestiń Almatydaǵy alǵashqy aýqymdy konserti 14 tamyzda Ortalyq stadıonda ótedi. Bıletterdi Freedom SuperApp qosymshasynan nemese Ticketon.kz saıtynan satyp alýǵa bolady. Alǵashqy satylym kúni-aq jankúıerler stadıondaǵy oryndardyń jartysyn satyp alǵan.