Qaraǵandyda sot ardager sportshyǵa «Qazaqstan Respýblıkasynyń halyqaralyq dárejedegi sport sheberi» ataǵyn berýden bas tartýdy zańsyz dep tanydy, dep habarlaıdy infohub.kz saıty.
Qaraǵandy oblysy sottarynyń resmı Telegram-arnasynda habarlanǵandaı, sot QR Týrızm jáne sport mınıstrliginiń Sport jáne dene shynyqtyrý isteri komıtetine qatysty ardager sportshynyń ákimshilik talap-aryzyn qarady. Talapta sport ataǵyn berýden bas tartý týraly sheshimdi zańsyz dep taný jáne kúshin joıý, sondaı-aq sport ataǵyn berý týraly qolaıly ákimshilik akt qabyldaýǵa mindetteý suraldy.
Talap qoıýshynyń paıymdaýynsha, zańnama normalarynda halyqaralyq jarystarda Qazaqstandy tanytyp, júldeli oryndarǵa ıe bolǵan ardager sportshylarǵa «Qazaqstan Respýblıkasynyń halyqaralyq dárejedegi sport sheberi» ataǵyn berýge tyıym salý nemese shekteý joq.
Jaýapker talapty qanaǵattandyrmaýdy surady, sebebi atalǵan sport ataǵyn berýge negiz — eresekter arasyndaǵy álem chempıonatyndaǵy nátıje. Demek, ardagerler arasyndaǵy álem chempıonatyna qatysý jáne ondaǵy júldeli oryn atalǵan negizge sáıkes kelmeıdi.
Sot sheshimimen talap qanaǵattandyryldy. Jaýapkerdiń daýlanǵan sheshimi kúshin joıylyp, sot sheshimi zańdy kúshine engen kúnnen bastap bir aı ishinde talap qoıýshyǵa «Qazaqstan Respýblıkasynyń halyqaralyq dárejedegi sport sheberi» ataǵyn berý týraly qolaıly ákimshilik akt qabyldaý mindeti júkteldi.
Sot anyqtaǵandaı, zańnamada ardager sportshylardy «eresekter» sanatynan shyǵaratyn ereje joq jáne halyqaralyq jarystarda Qazaqstan Respýblıkasyn tanytatyn ardager sportshylarǵa sport ataqtaryn berýge tyıym salynbaǵan.
Qaraǵandy oblystyq sotynyń ákimshilik ister jónindegi sot alqasynyń qaýlysymen birinshi satydaǵy sot sheshimi ózgerissiz qaldyryldy.