Kaspı teńizindegi oqý-jattyǵý kezinde qaza tapqan aǵa leıtenant Oljas Muhtarulynyń denesi arnaıy áskerı ushaqpen Túrkistanǵa jetkizildi. Qazaqstan Qorǵanys mınıstrligi áskerı qyzmetshiniń denesi týǵan jerine jóneltilgenin habarlady, dep jazady infohub.kz saıty.
«Mańǵystaý oblysyndaǵy oqý-jattyǵý barysynda qaza tapqan aǵa leıtenant Oljas Muhtarulynyń denesi áskerı ushaqpen týǵan jeri — Túrkistanǵa jetkizildi», — delingen qorǵanys vedomstvosynyń habarlamasynda.
Oljas Muhtaruly Túrkistan oblysynyń týmasy bolatyn. Onyń denesi qoshtasý men jerleý rásimi úshin óńirge ákelindi.
Buǵan deıin Kaspı teńizindegi oqý-jattyǵý kezinde qaza tapqan Batys Qazaqstan oblysynyń úsh áskerı qyzmetshisiniń denesi Oralǵa jetkizilgeni habarlanǵan. Qoshtasý men jerleý rásimi 26 qyrkúıekte ótedi.
Eske salaıyq, 24 qyrkúıekte Áskerı-teńiz kúshteriniń Kaspıdegi oqý-jaýyngerlik mindetterin oryndaýy kezinde kenetten bastalǵan daýyl men ekpindi jelden 17 áskerı qyzmetshi ashyq teńizge aǵyzylyp ketken. Oqıǵa saldarynan 14 adam qaza tapty.
Tótenshe oqıǵanyń sebepterin anyqtaý úshin Premer-mınıstr orynbasary Qanat Bozymbaev basqarǵan úkimettik komısıa quryldy. Nemquraılylyq jáne keme júrgizý erejelerin buzý baptary boıynsha qozǵalǵan qylmystyq is Bas prokýratýranyń erekshe baqylaýynda.
Sarbazdardyń qaza tabýyna baılanysty prezıdent Qasym-Jomart Toqaev 25 qyrkúıekti Qazaqstanda jalpyulttyq aza tutý kúni dep jarıalady.
Bas prokýratýra 30 áskerı qyzmetshiden jaýap alyp, kúdiktiler sheńberin anyqtaǵanyn málimdedi.
Kaspıdegi «Hazar qorǵany – 2026» oqý-jattyǵýy kezinde áskerı qyzmetshilerdiń qaza tabýyna qatysty is boıynsha Qazaqstan Qorǵanys mınıstrliginiń bes ofıseri ustaldy.