15 tamyz keshkisin «Kenderli» demalys aımaǵynan Jańaózenniń úsh turǵyny úrlemeli qaıyqpen teńizge shyǵyp, iz-túzsiz joǵalǵan. Týystary bul týraly 112 púltine habarlaǵan, dep málimdeıdi infohub.kz saıty.
TJM qyzmetkerleri dereý aýqymdy izdestirý operasıasyn uıymdastyrdy. İzdeý jumystaryna drondar men «Qazavıaqutqarý» tikushaǵy jumyldyryldy.
İzdeý barysynda qutqarýshylar jaǵaǵa ózdiginen júzip kele jatqan er adamdy tapty. Ony bortqa kóterip, qurlyqqa jetkizdi.
Qalǵan ekeýin izdeý túnde de jalǵasty. Jumysty qarańǵylyq pen akvatorıanyń úlken aýmaǵy qıyndatty. İzdeý tórt sektorda ártúrli baǵytta júrgizildi.
Qutqarýshylar akvatorıanyń 20 shaqyrymnan astamyn, al áýe arqyly 70 shaqyrymnan astamyn tekserdi. Nátıjesinde eki er adam jaǵadan 10 shaqyrym jerde tiri kúıinde tabyldy.
Operasıaǵa TJM qutqarýshylary men eriktiler ǵana emes, qazaqstandyq shekarashylar da qatysty.
Buǵan deıin Astananyń 41 jastaǵy turǵyny «Arys» kópiriniń astynda Esil ózeninen ótpek bolyp, kúshin durys eseptemeı qalǵany habarlanǵan. Ony janyndaǵy qutqarýshylar aman alyp qalǵan. Qostanaı oblysy Jitiqarada TJM qyzmetkerleri Shortandy ózeninde batyp bara jatqan áıeldi qutqarsa, Semeıde mas kúıindegi er adamǵa kómek kórsetip, baqytsyz jaǵdaıdyń aldyn alǵan.