Qazaqstan Respýblıkasynyń Bas prokýratýrasy Vetnamnan bloger Qaısar Qamzanyń ekstradısıalanǵanyn habarlady. Ol zańsyz qumar oıyn bıznesin uıymdastyrýǵa kómektesti dep kúdiktelýde, dep habarlaıdy infohub.kz.
Vedomstvo resmı habarlama men Qazaqstan azamatyn tapsyrý sáti túsirilgen beınejazbany jarıalady. Qaısar Qamza Instagram-daǵy kóp mıllıondy aýdıtorıasymen tanymal — 2,2 mıllıonnan astam jazylýshysy bar.
Tergeý derekteri boıynsha, 2025 jyldyń qańtarynda bloger áleýmettik jeliler men messendjerlerdegi aıtarlyqtaı yqpalyn paıdalanyp, aqyly negizde zańsyz ınternet-kazınonyń jarnamasyn ornalastyryp, Qazaqstan azamattaryn qumar oıyndarǵa tartqan. Resýrsty jyljytqany úshin onyń krıptovalúta ámıanyna 200 myń AQSh dollaryna jýyq aqsha túsken. Jalpy, qylmystyq top músheleri 2021-2025 jyldar aralyǵynda Qazaqstanda birneshe zańsyz onlaın-kazınonyń qyzmetin uıymdastyryp, tólem termınaldary arqyly 106 mıllıard teńgeden astam aqshany zańsyz alǵan.
Bas prokýratýrada taǵy toǵyz sybaılastyń qamaýda ekenin, basqalarynyń izdeý jarıalanǵanyn atap ótti. Qazirgi ýaqytta kúdikti tergeý ızolátoryna qamaldy. Aıyptalýshyǵa múlikti tárkileýmen jeti jylǵa deıin bas bostandyǵynan aıyrý jazasy kózdelgen.
Buǵan deıin quqyqtyq statısıka jáne arnaıy esepke alý organdarynyń portalynda Qaısar Qamzaǵa qatysty baǵdarlama jarıalanǵan bolatyn. Bastamany Qarjylyq monıtorıń agenttigi kótergen, izdeýdi Astana qalasy boıynsha ekonomıkalyq tergeý departamenti júrgizgen. Keıin bloger izdeý týraly aqparatqa túsinikteme berdi, al QMA ony zańsyz qumar oıyn qyzmetine kómektesti dep kúdiktenetinin málimdedi.
Anyqtalǵandaı, kúdikti bes jyl boıy Instagram-da «qais_arr» búrkenshik atymen belsendi blogerlik qyzmet júrgizgen (2,4 mıllıon jazylýshy), sondaı-aq «Qora enterteınment» jabyq Telegram-arnasyn basqarǵan (368 myń jazylýshy). 13 sáýirde onyń Vetnamda ustalǵany belgili boldy, al mamyrda ol uzaq ýaqyttan keıin alǵash ret jazylýshylarmen baılanysqa shyǵyp, bolǵan oqıǵa týraly aıtty.