Qazaqstannyń Qarjy monıtorıńi agenttigi Ózbekstan azamaty Mahmýd Hıkmatovty (Maha.dxb búrkenshik atymen tanymal) halyqaralyq izdeý jarıalady, dep habarlaıdy infohub.kz saıty.
Agenttiktiń baspasóz qyzmetiniń málimetinshe, izdeý jarıalanǵan bloger Maha.dxb — Hıkmatov Mahmýd Ýmıdovıch, 2000 jyly týǵan, Ózbekstan Respýblıkasynyń azamaty.
Sot oǵan qatysty qamaýda ustaý túrindegi bultartpaý sharasyn sanksıalady. Ol zańsyz ınternet-kazınony jyljytýǵa kúdikti. Qazaqstan Respýblıkasynyń aýmaǵynda ınternet-kazınonyń zańsyz ınterfeısin usyný, aqsha qarajatyn qabyldaý jáne tóleý (ekvaırıń, mobıldi komersıa, krıptovalúta), sondaı-aq el azamattarynyń arasynan kóbirek oıynshylardy tartý maqsatynda jarnama jasaý boıynsha turaqty sqema jumys istegen.
QMA-niń málimdeýinshe, ınternet-kazınony jyljytý úshin uıymdastyrýshylar bloger Hıkmatovty tartqan, oǵan Qazaqstan aýmaǵynda qyzmet etetin ınflúenserlerdi jarnamalyq kontent ornalastyrýǵa tartý róli júktelgen. Osy qyzmet aıasynda Hıkmatov blogerlerden olardyń áleýmettik jelileriniń statısıkalyq derekterin, onyń ishinde demografıany, jazylýshylar geografıasyn, sondaı-aq aýdıtorıa qamtý kórsetkishterin suraǵan, osynyń negizinde jarnama qyzmetteriniń quny anyqtalǵan. Barlyǵy ol 35-ten astam blogerdi, onyń ishinde Qamza Q. blogerin tartqan.
Keń aýdıtorıaǵa ıe bola otyryp, Qamza Q. ınternet-kazınoǵa referaldyq siltemeler ornalastyryp, árbir paıdalanýshynyń ótýi úshin syıaqy alyp, Qazaqstan Respýblıkasynyń azamattaryn tyıym salynǵan qumar oıyn áreketine qasaqana tartqan.
6 tamyzda Qamza Q. Vetnam Sosıalısik Respýblıkasynan ekstradısıalandy. Eger sizge izdeýdegi adamnyń ornalasqan jeri týraly qandaı da bir aqparat belgili bolsa, Qarjy monıtorıńi agenttigine myna telefondar boıynsha habarlaýdy suraımyz: +7 7172 70 84 78 — kezekshi bólim. Syıaqy jáne anonımdilik kepildendiriledi.
Buǵan deıin quqyqtyq statısıka jáne arnaıy esepke alý organdarynyń portalynda bloger Qaısar Qamzaǵa arnalǵan baǵdarlama jarıalanǵan. Bastamashysy — Qarjy monıtorıńi agenttigi, izdeýdi QMA-niń Astana qalasy boıynsha ekonomıkalyq tergeý departamenti júrgizýde. Keıin Qaısar Qamza Qarjy monıtorıńi agenttiginiń ony izdeý jarıalaǵany týraly aqparatqa túsinikteme berdi. Kóp uzamaı QMA blogerdi zańsyz qumar oıyn áreketine kómektesti dep kúdiktenetinin málimdedi.
5 jyl boıy kúdikti Instagram-da "qais_arr" (2,4 mln jazylýshy) ataýymen belsendi blogerlik qyzmet júrgizgen, sondaı-aq Telegram-da "Qora enterteınment" jabyq arnasyn (368 myń jazylýshy) basqarǵan. 13 sáýirde onyń Vetnamda ustalǵany belgili boldy. Mamyr aıynda ol uzaq ýaqyttan keıin alǵash ret jazylýshylarmen baılanysqa shyǵyp, Vetnamda ustalǵanyn aıtty. 6 tamyzda Bas prokýratýra zańsyz qumar oıyn bıznesin uıymdastyrýǵa kómektesti dep kúdiktelgen bloger Qaısar Qamzanyń Vetnamnan ekstradısıalanǵanyn habarlady.