Qazaqstan Amerıka kıno óneri jáne ǵylym akademıasynyń 99-shy syılyǵynda eldi tanystyratyn fılmdi anyqtady. «Úzdik halyqaralyq tolyqmetrajdy fılm» (Best International Feature Film) sanatyndaǵy ulttyq kandıdat rejıser Elzat Eskendirdiń «Ábil» dramasy boldy. Fılm oqıǵasy 1990-jyldardaǵy Qazaqstandaǵy ózgerister aıasynda órbıdi, dep habarlaıdy infohub.kz saıty.
Sújet kórermenderdi 1993 jylǵa jeteleıdi. Elde aýqymdy qoǵamdyq jáne ekonomıkalyq ózgerister júrip jatyr, al basty keıipker — qoıshy Ábil — kolhoz taratylǵannan keıin jekeshelendirýdiń jańa shyndyǵyna tap bolady. Ol jańa erejelerge úırenip qana qoımaı, óz abyroıyn qorǵaýǵa májbúr.
Fılmde basty róldi Erlan Tóleýtaı somdady, al operator-qoıýshy — polák mamany Iolanta Dylevska. Qazaqstannyń Oskar komıteti kartınanyń kórkemdik jáne vızýaldyq deńgeıin erekshe atap ótti.
«Kúshti, shynaıy kınematografıalyq týyndy. Keremet akterlik dýet — basty keıipker jáne onyń jubaıy», — dedi Qazaqstannyń Oskar komıtetiniń múshesi, prodúser Anara Kashaganova.
Kınooperator Kazbek Amerjanov ta operatorlyq jumysty maqtap, ony ustamdy ári baıqalmaıtyn, biraq sheber dep atady. Onyń aıtýynsha, fılm tutas ári kúshti áser qaldyrady.
Buǵan deıin Kursiv LifeStyle «Ábil» fılmine úlken resenzıa jarıalaǵan bolatyn. Eske salaıyq, kartınanyń álemdik premerasy Pýsan halyqaralyq kınofestıvalinde ótti. Odan keıin drama Fransıa, Qyrǵyzstan, Vetnam jáne Bangladesh festıválderinde birqatar júldege ıe boldy. Qazaqstandyq prokatqa ol 2026 jyldyń maýsymynda shyqty.