Qazaqstan alǵashqy atom elektr stansıasy jobasyn is júzinde iske asyrýǵa kóshti: ony jobalaý men salýǵa kelisimshartqa qol qoıyldy, dep habarlaıdy infohub.kz saıty.
QR Atom energıasy agenttiginiń málimetinshe, Vladıvostokta ótken XI Shyǵys ekonomıkalyq forýmy aıasynda «Qazaqstandyq atom elektr stansıalary» JSHS men «Atomstroıeksport» AQ («Rosatomnyń» enshiles kompanıasy) arasynda Qazaqstanda AES jobalaý, jabdyqtardy jetkizý jáne salý boıynsha kelisimshartqa qol qoıyldy.
Agenttikte kelisimshartqa qol qoıý jobanyń jańa, praktıkalyq kezeńge ótkenin bildiretinin atap ótti. 2026 jylǵy 28 mamyrdaǵy úkimetaralyq kelisimge sáıkes, taraptar Qazaqstan Respýblıkasynyń úkimetimen kelisýdi qosa alǵanda, kózdelgen rásimderdi jalǵastyrady.
Vedomstvo jobanyń el úshin strategıalyq mańyzyn erekshe atap ótti: ekonomıkanyń, ónerkásiptiń, ınfraqurylymnyń ósýi, sıfrlandyrý jáne jasandy ıntellekttiń damýy jaǵdaıynda senimdi elektr energıasyna qajettilik arta túsedi. Atom energetıkasy ondaǵan jyldar boıy turaqty bazalyq generasıany qamtamasyz etip qana qoımaı, otandyq ónerkásipti damytýǵa, ozyq tehnologıalardy engizýge jáne kadrlar daıarlaýǵa múmkindik beredi.
Jobany iske asyrý kezinde lokalızasıaǵa — qazaqstandyq kásiporyndardy, mamandardy, taýarlardy, jumystar men qyzmetterdi barynsha tartýǵa erekshe nazar aýdarylady.
Eske salaıyq, Balqash kólindegi Úlken aýylynyń mańynda alǵashqy AES-tiń belsendi qurylysy 2027 jyly bastalady. Stansıaǵa halyqtyq konkýrs qorytyndysy boıynsha tańdalǵan «Balqash» ataýy beriledi.