Qazaqstanda jasandy ıntellekt negizinde qurylǵan «Kásipkerlik salasyndaǵy mindetti talaptar tizilimi» pılottyq jobasy iske qosyldy. Servıs zańnamany avtomatty túrde taldap, kásipkerlerge mindetti talaptardy qadaǵalaýǵa kómektesedi, dep habarlaıdy infohub.kz saıty.
Ulttyq ekonomıka mınıstrligi men Qazaqstannyń Jasandy ıntellekt jáne sıfrlyq damý mınıstrligi «Kásipkerlik salasyndaǵy mindetti talaptar tizilimi» pılottyq jobasyn iske qosty, dep habarlady UEM.
Jańa sıfrlyq servıs jasandy ıntellekt algorıtmderine negizdelgen jáne kásipkerlerdiń zańnama talaptaryna qol jetkizýin jeńildetýge arnalǵan. Júıe qoldanystaǵy normatıvtik quqyqtyq aktilerdi avtomatty túrde taldap, bızneske qoıylatyn talaptardy anyqtaıdy, olardy júıeleıdi jáne aqparatty jańartyp otyrady.
Mınıstrlikte bul joba kásipkerlerge ákimshilik júktemeni azaıtyp, retteýdiń ashyqtyǵyn arttyryp, bıznes ortany neǵurlym boljamdy etedi dep atap ótti.
Zańnamany avtomattandyrylǵan taldaý kásipkerlerdiń naqty qyzmet túrine qoıylatyn talaptardy izdeýge jáne zerdeleýge jumsaıtyn ýaqyty men resýrstaryn qysqartýǵa múmkindik beredi. Qurylymdalǵan aqparat bızneske zańnamada jaqsy baǵdarlaýǵa jáne belgilengen normalardy bile tura buzýdyń qaýpin azaıtýǵa kómektesedi.
Sonymen qatar, júıe normatıvtik quqyqtyq aktilerdegi ózgeristerdi jedel qadaǵalap, olardy kompanıalardyń jumysynda eskerýge múmkindik beredi.
Pılottyq joba prezıdenttiń 2025 jylǵy 8 qyrkúıektegi «Qazaqstan jasandy ıntellekt dáýirinde» atty joldaýyn oryndaý úshin iske qosyldy. Ony júzege asyrý úshin eki mınıstrlik birlesken buıryqqa qol qoıdy.
Qazir jańa fýnksıonal bızneske arnalǵan sıfrlyq AI-platformada qoljetimdi. Jaqyn arada servısti eGov Business portalynda da iske qosý josparlanýda.
Buǵan deıin «Kýrsıv» prezıdent Qasym-Jomart Toqaev sıfrlandyrý men jasandy ıntellektti talqylaýdan olardy kúndelikti ómirde praktıkalyq qoldanýǵa kóshýge shaqyrǵanyn jazǵan bolatyn. Onyń aıtýynsha, sıfrlyq tehnologıalar azamattarǵa qyzmet etip, bıznes júrgizýge jáne tabys tabýǵa kómektesýi tıis. 2026 jyl Qazaqstanda Sıfrlandyrý jáne jasandy ıntellekt jyly dep jarıalandy.