Qazaqstannyń erler basketbol quramasy Azıa Kýbogy-2029 aldyn ala irikteýiniń birinshi kezeńin V tobynda ekinshi orynmen aıaqtady. Almatyda ótken úı týrnıriniń sońǵy oıyndarynda qazaqstandyqtar Qyrǵyzstandy (88:67) jáne Shrı-Lankany (87:58) jeńdi, dep habarlaıdy infohub.kz.
30 tamyzda ótken Qyrǵyzstanmen kezdesý alań ıeleriniń senimdi jeńisimen aıaqtaldy. Úlken úziliske deıin-aq Qazaqstan 49:31 esebimen alda boldy, al sońǵy shırek aldynda basymdyq 25 upaıǵa jetti. Qarsylastyń sońynda aıyrmashylyqty qysqartý áreketine qaramastan, mach nátıjesi ózgergen joq – 88:67.
Qazaqstan quramasyndaǵy eń ónimdi oıynshy Robert Pan boldy, ol 24 upaı jınady. Ol úsh upaılyq laqtyrýlardyń onynan jetisin dál oryndap, tórt podbor jáne tórt ustap alý jasady. Danııl Severgın 20 upaı, Vladımır Ivanov 11 upaı enshiledi. Qyrǵyzstan sapynda Temırlan Kapakov pen Nazım Adylbekov 17 upaıdan jınady.
Bul jeńis Qazaqstanǵa toptyń úzdik úshtigine enýin merziminen buryn qamtamasyz etti. Alań ıelerimen birge ekinshi kezeńge joldamany Palestına men Shrı-Lanka aldy.
Shrı-Lankaǵa qarsy sońǵy oıynda alań ıeleri úlken úziliske deıin jeńimpaz týraly barlyq suraqtardy sheship qoıdy. Birinshi shırek 25:8 esebimen aıaqtaldy, al mach ortasynda Qazaqstan 51:15 esebimen alda boldy. Ekinshi jartyda qarsylas aıyrmashylyqty qysqartqanymen, bul qazaqstandyqtardyń iri jeńiske jetýine kedergi bolmady – 87:58.
Qazaqstannyń úzdik mergeni Shaım Kýanov boldy, ol 15 upaı, jeti podbor jáne úsh pas jınady. Rýslan Aıtkalı dabl-dabl jasady: 12 upaı jáne jeti podbor, Stanıslav Sahıpov – 11 upaı, Anton Bykov – 10. Shrı-Lanka sapynda Kande Dasýn Nılanta Mendısa 19 upaı jınady.
Osylaısha, Qazaqstan quramasy úı kezeńin tórt machtyń úsheýinde jeńispen aıaqtady. Qyrǵyzstan men Shrı-Lankadan bólek, Aleksandr Lysák komandasy Maldıvterdi (114:43) tize búktirdi. Jalǵyz jeńilisti qazaqstandyqtar Palestınadan (67:80) kórdi.
V tobynda birinshi oryndy barlyq tórt machta jeńip, segiz upaı jınaǵan Palestına aldy. Qazaqstan jeti upaımen ekinshi, Shrı-Lanka (6) úshinshi boldy. Qyrǵyzstan (5) men Maldıvter (4) Azıa Kýbogy úshin kúresti aıaqtady.
Ekinshi aldyn ala kezeńde Qazaqstan, Palestına jáne Shrı-Lanka A tobynyń úzdik úsh quramasymen birge E tobyna túsedi. Oıyndar 2026 jyldyń 23 qarashasy men 1 jeltoqsany aralyǵyndaǵy halyqaralyq terezede ótedi. Alty komandanyń tórteýi Azıa Kýbogy-2029 negizgi irikteý týrnırine joldama alady.