2026 jyldyń alǵashqy jeti aıynda Qazaqstandaǵy avtomobıl jáne qalalyq elektr kólik kásiporyndarynyń jolaýshylar tasymalynan túsken tabysy 303,1 mlrd teńgeni qurady. Bul 2022 jyldyń sáıkes kezeńimen salystyrǵanda úsh esege jýyq artyq (ol kezde 105,2 mlrd teńge bolǵan), dep habarlaıdy infohub.kz.
Tek sońǵy bir jylda ósim 13,9%-dy qurasa, ınflásıany eskergende 6,1%-ǵa ósken. Tabystyń negizgi bóligin avtobýstar qamtamasyz etti: 192 mlrd teńge, bul ótken jylmen salystyrǵanda 15,5%-ǵa artyq (naqty mánde — plús 11,6%). Ekinshi orynda — taksı: 101 mlrd teńge, ósim 10,5%, alaıda ınflásıany eskersek, tabys 3,2%-ǵa tómendegen. Qalǵan kólik túrleri 7,7 mlrd teńge ákeldi, onyń ishinde tramvaılar — 1,1 mlrd, troleıbýstar — 1,3 mlrd teńge.
Tórt jyl ishinde jolaýshylar aǵyny 41,2%-ǵa ósti: 2022 jyldyń qańtar-shilde aılarynda 786 mln adam tasymaldansa, 2026 jyly bul kórsetkish 1,1 mlrd-qa jetti. Alaıda ósý qarqyny baıaýlap keledi: 2023–2025 jyldary jyl saıynǵy ósim 9–11% bolsa, bıyl 5%-dan tómen. Jolaýshylar aǵynynyń 98,2%-y avtomobıl jáne qalalyq elektr kóligine tıesili.
Tabys boıynsha kóshbasshylar — Almaty (59,7 mlrd teńge) jáne Astana (48 mlrd teńge), olar barlyq túsimniń úshten birinen astamyn qamtamasyz etedi. Odan keıin Mańǵystaý oblysy (24,4 mlrd), Shymkent (24 mlrd) jáne Qaraǵandy oblysy (22,5 mlrd) tur. Tasymaldanǵan jolaýshylar sany boıynsha da Almaty (267,5 mln) men Astana (188,3 mln) alda, olar jalpy jolaýshylar aǵynynyń shamamen 41%-yn quraıdy.
Tabystyń ósýi ishinara jolaqynyń qymbattaýymen túsindiriledi. 2026 jyldyń shildesinde avtomobılmen jolaýshy tasymaly jyldyq mánde 7,1%-ǵa qymbattasa, taksı — 13,4%-ǵa, qalalyq avtobýs — 3,3%-ǵa qymbattady. Avtobýstar jeti aıda 971,7 mln jolaýshy tasymaldady (+4,5%), al taksı — 88,8 mln (+3,2%). Jolaýshylar aǵynynyń ósýine qaramastan, taksı júrgizýshileriniń naqty tabysy 3,2%-ǵa tómendedi.