Qazaqstan men Ázirbaıjan koronavırýs pandemıasyna baılanysty toqtatylǵan Kaspı teńizindegi jolaýshylar tasymalyn qaıta bastaý týraly kelisimge keldi. Bul týraly Qazaqstan Respýblıkasynyń Ázirbaıjandaǵy elshisi Álim Baıel habarlady, dep jazady NUR.KZ, infohub.kz saıtyna silteme jasap.
Dıplomattyń aıtýynsha, qazaqstandyq tarap Quryq porty — Baký porty — Quryq porty baǵytyndaǵy parom jelisinde jolaýshylar qatynasyn qalpyna keltirý bastamasyn kóterdi. Bul tasymaldar 2020 jylǵa deıin jumys istep, COVID-19 pandemıasyna baılanysty toqtatylǵan edi.
Álim Baıel toqtatylǵanǵa deıin Kaspı arqyly jolaýshylar tasymaly qyzmetin jylyna shamamen 1500 adam paıdalanǵanyn atap ótti. Dıplomat bolashaqta osy baǵyt boıynsha saparǵa shyqqysy keletinderdiń sany aıtarlyqtaı artatynyna senim bildirdi. Parom jelisiniń qaıta jumys isteýi elder arasyndaǵy jolaýshylar qatynasynyń damýyna serpin berip, týrısik almasýdy kúsheıtip, Orta dálizdiń múmkindikterin keńeıtedi dep kútilýde.
Elshi sondaı-aq ázirbaıjan tarapy Qazaqstannyń usynysyn qoldaǵanyn habarlady. Qazirgi ýaqytta eki eldiń kólik vedomstvolary jolaýshylar qatynasyn tezirek qalpyna keltirý boıynsha jumysqa kiristi. Baký men Astana, Almaty, Shymkent, Aqtaý jáne Atyraý sıaqty qazaqstandyq qalalar arasynda 37 áýe reısi oryndalatyny atap ótildi.